ထားဝယ်ခရိုင် ရေဖြူမြို့နယ် ဝက်ချောင်းတံတားအနီး အကြမ်းဖက်စစ်ကောင်စီတပ်ယာဥ်တန်းအား တိုက်ခိုက်မှုတွင် စစ်ကောင်စီတပ်မှ ၃၀ဦးခန့်သေဆုံးကြောင်း Dawei Guerrilla Revolutionary Force – DGRF နှင့်မဟာမိတ်များက ယနေ့(သြဂုတ် ၂)ထုတ်ပြန်သည်။
ရေဖြူမြို့နယ် ဧကနိ-ခမောင်ချောင်း ကျေးရွာများသို့ ဝင်ရောက်သောင်းကျန်းဖျက်ဆီးပြီး ပြန်ထွက်လာသော စစ်ကောင်စီယာဥ်တန်းကို ဇူလိုင် ၃၁ရက် ည ၇နာရီခွဲခန့်တွင် DGRF နှင့် မဟာမိတ်တပ်များက မိုင်းဆွဲတိုက် ခိုက်ခဲ့ခြင်းဖြစ်ကြောင်း ဖော်ပြသည်။
အဆိုပါတိုက်ခိုက်မှုတွင် Vigo တစ်စီးနှင့် မြေတင်ကားတစ်စီး မိုင်းထိမှန်ကာ လုံးဝထိုးရပ်သွားပြီး ထိုယာဥ်နှစ်စီးမှာ ပစ်ကွင်းအတွင်း ရောက်ရှိနေရာ (၄၀)မမအပါအဝင် လက်နက်ငယ်များဖြင့် ၈မိနစ်ခန့် ဆက်တိုက်ပစ်ခတ်တိုက်ခိုက်ခဲ့သည်ဟု ဆိုသည်။
သြဂုတ် ၁ ရက် မြေပြင်သတင်းစုံစမ်းမှုများအရ အထက် ပါတိုက်ခိုက်မှုတွင် စစ်ကောင်စီတပ်မှ ၃၀ဦးခန့် သေဆုံးခဲ့ကြောင်း သတင်းရရှိသည်ဟု ဖော်ပြသည်။
“တိုက်ခိုက်မှုကတော့ စီစဉ်ထားတဲ့အတိုင်း အကွက်ကျကျအောင်မြင်ခဲ့ပါတယ်။ စစ်ကောင်စီတပ်သားတွေအတွက် ထားဝယ်ခရိုင်ထဲ ခြေလှမ်းတဲ့ နေရာတိုင်းမှာ DGRF ရဲဘော်တွေက ငရဲပို့ပေးဖို့ အသင့်စောင့်နေတယ်ဆိုတာ သိစေလိုတဲ့ရည်ရွယ်ချက်နဲ့ တိုက်ခိုက်ခဲ့တာဖြစ်ပါတယ်”DGRF မှ တော်လှန်ရေးရဲဘော်တစ်ဦးက ပြောသည်။
ထို့အပြင် ယမန်နေ့(သြဂုတ် ၁)နေ့လယ် ၂ နာရီခွဲခန့်တွင် အင်အား ၁၅၀ခန့်ပါ စစ်ကောင်စီတပ်မှ ယာဥ်ခုနစ်စီးကို ရေဖြူမြို့နယ် သဗြေဇွန်းရွာအနီးတွက် အဝေးထိန်းမိုင်းနှစ်လုံးဖြင့် ဖောက်ခွဲတိုက်ခိုက်ခဲ့ကြောင်း ထုတ်ပြန်သည်။
ယင်းတိုက်ခိုက်မှုတွင် နည်းပညာစနစ်ချို့ယွင်းအားနည်းမှုကြောင့် ထိချက်အနည်းငယ်လွဲသွားပြီး စစ်ကောင်စီတပ်များ လွတ်သွားခဲ့ကြောင်း ဖော်ပြသည်။
ရေဖြူမြို့နယ်ရှိ အထက်ပါတိုက်ခိုက်မှုများကို DGRF ၊ လောင်းလုံ(ပကဖ)LLPDF ၊ T-PDF စသည့်မဟာ မိတ်တပ်များမှ အချိတ်အဆက်မိမိ ပူးပေါင်းတိုက်ခိုက်ခဲ့ခြင်းဖြစ်ကြောင်း ထုတ်ပြန်ထားသည်။
