ဖားကန့်သို့အသစ်ရောက်လာ​သောစစ်​ကောင်စီတပ်ရင်းတစ်ခု စစ်တပ်နှင့်ဆက်နွှယ်​သော​ကျောက်စိမ်းကုမ္ပဏီလုပ်ကွက်များတွင်တပ်​​ဖျောက်ထားဟု​ဒေသခံများ​ပြော

တပ်အပြောင်းအလဲ ပြုလုပ်ပြီးဖားကန့်သို့ အသစ်ရောက်ရှိလာသော စစ်ကောင်စီတပ်ရင်းတစ်ခုသည် စစ်ကောင်စီနှင့်ဆက်နွှယ်​နေ​သော ကျောက်တူးဖော်ရေးကုမ္မဏီလုပ်ကွက်များထဲတွင် တပ်ဖျောက်ထား​ကြောင်း ဒေသခံများကပြောသည်။

စစ်ကောင်စီ၏ တပ်မ ၆၆ လက်အောက်ခံတပ်ရင်းတစ်ခုသည် ဖားကန့်ဒေသသို့ မေ လ ၂၇ရက်က ရောက်ရှိလာခဲ့ပြီး အဆိုပါတပ်ရင်း ရှိရာနေရာကို ဒေသခံများက စုံစမ်းသိရှိခဲ့ခြင်းဖြစ်သည်။

“ပျောက်နေတဲ့စစ်ကြောင်းက ကုမ္မဏီထဲတွေ ဝင်ခိုနေတာ။မြန်မာတကောင်းတို့၊ တစ်သုံးလုံးတို့ သူတို့နဲ့ ပါတနာဖြစ်တဲ့ ကုမ္မဏီထဲတွေမှာ တပ်ဖျောက်နေတာ”ဟု ဖားကန့်ဒေသခံတစ်ဦးကပြောသည်။

စစ်ကောင်စီသည် ဖားကန့်မြို့တွင်းအဓိကဆက်သွယ်ရေးတံတားတစ်စင်းဖြစ်သော ဥရုရတနာကျောက်စိမ်းတောင်တံတားကိုလည်း ညအချိန် ဖြတ်သန်းခွင့်မပြုတော့ဘဲ နေရာအများအပြား၌ ကင်းပုန်းဝပ်နေသည်ဟု ​ဒေသခံများက​ပြောသည်။

“ညအချိန်ဆိုမြို့ပေါ်ရောမှော်ထဲရော ကင်းပုန်းဝပ်တာတွေလုပ်နေတယ်။ မှော်ထဲသွားရင်သတိနဲ့သွားလာကြပါ”ဟုဒေသတွင်း စစ်ကောင်စီလှုပ်ရှားမှုကို စုံစမ်းထောက်လှမ်းနေသူတစ်ဦးကပြောသည်။

ဖားကန့်တွင်လတ်တလောစစ်ရေးအခြေအ​နေငြိမ်သက်နေပြီးမေလ ၂၃ ရက်နေ့ကတိုက်ပွဲတွင်KIA-ကချင်လွတ်​မြောက်​ရေးတပ်မ​တော် နှင့်ပြည်သူကာကွယ်ရေးတပ်-PDFတို့ပူးပေါင်းတပ်က စစ်​ကောင်စီတပ်ကိုတိုက်ခိုက်ရာစစ်ကောင်စီတပ်ဖွဲ့ဝင်ခုနှစ်ဦးသေဆုံးခဲ့သည်။