Ukrayna Prezidenti Ofisinin rəhbəri Andrey Yermak sosial media hesabından verdiyi açıqlamada rusların Ukraynanın Xarkov vilayətinin Kupyansk rayonunun Qroza kəndində mülki obyekti raketlərlə bombaladığını bildirib.
Gununsesi.info xəbər verir ki, hücumda biri 6 yaşlı uşaq olmaqla 49 nəfərin öldüyünü, 6 nəfərin isə yaralandığını qeyd edən Yermak, hadisə yerində dağıntıların çıxarılması işlərinin davam etdiyini bildirib.
Xarkov vilayətinin Hərbi Administrasiyasının rəisi Oleq Sinegubov qeyd edib ki, Rusiya ordusu Qroza kəndində dinc əhalinin çox olduğu kafe və mağazanı bombalayıb.
Ukrayna prezidenti Vladimir Zelenski sosial media hesabında açıqlama yayıb və Rusiyanın raket hücumunda həlak olanların yaxınlarına başsağlığı verib.
Zelenski “Rusiya amansızcasına cinayət törədib” ifadəsini işlədib və əlavə edib: “Rusiya terrorizminə son qoyulmalıdır. Rusiyaya sanksiyaların öhdəsindən gəlməyə kömək edən hər kəs günahkardır. Rusiyanı hələ də dəstəkləyən hər kəs pisliyi dəstəkləyir. Rusiya öz soyqırım təcavüzünü dünyada normaya çevirmək üçün bu və buna bənzər terror aktlarını həyata keçirir. Həyatın qorunmasında bizə dəstək olan hər bir rəhbərə və hər bir insanlara təşəkkür edirəm“.
Rusiyaya cavab verəcəklərini vurğulayan Zelenski Ukraynanın hava hücumundan müdafiə sistemlərinin gücləndirilməsi ilə bağlı Avropa ölkələrinin liderləri ilə danışıqlar apardıqlarını bildirib.
Səid Əhmədli
Gununsesi.info
