Almaniya kansleri Olaf Şolts, Danimarkanın baş naziri Mette Frederiksen, Çexiyanın baş naziri Petr Fiala, Estoniyanın baş naziri Kaja Kallas və Hollandiyanın baş naziri Mark Rutte birgə məktub yazaraq, uzunmüddətli perspektivdə Ukraynanı dəstəkləmək üçün kollektiv səy göstərməyə çağırıblar.
Gununsesi.info xəbər verir ki, məktubu “Financial Times” nəşri dərc edib.
“Biz Ukraynanın dostlarını və tərəfdaşlarını ümumi Avropa məsuliyyəti kimi Ukraynaya davamlı uzunmüddətli hərbi dəstək öhdəliyini bir daha təsdiqləməyə çağırırıq. Bu, hər bir ölkənin qəbul etməli olduğu qərardır. Yalnız bundan sonra Ukrayna Rusiyanın təcavüzünə qarşı müdafiədə uğur qazana biləcək”, məktubda deyilir.
Beş ölkənin hökumət liderləri Aİ və onun üzv dövlətlərinin səylərini yeniləməli və hərbi dəstəyi artırmalı olduqlarını təkid edirlər. Onlar qeyd ediblər ki, yük o qədər böyükdür ki, bütün dövlətlər Ukraynanı dəstəkləmək üçün əlindən gələni etməlidir – bu, kollektiv səy olaraq qalmalıdır.
“Keçən ilin əvvəlində Aİ 2024-cü ilin mart ayının sonuna kimi Ukraynaya bir milyon artilleriya mərmisi çatdırmaq kimi iddialı məqsədə nail olmaq öhdəliyini götürdü. Acı həqiqət: biz bu məqsədə nail olmamışıq”, – məktubda deyilir.
Müraciətində liderlər Kiyevə döyüş sursatı və silah sistemlərinin, xüsusən haubitsaların, tankların, pilotsuz uçuş aparatlarının və hava hücumundan müdafiə vasitələrinin “dərhal” təhvil verilməsinin zəruriliyini qeyd ediblər, çünki bu gün verilən yeni sifarişlər gələn ilə qədər döyüş meydanına düşməyəcək.
Bu məqsədlə onlar mövcud ehtiyatlardan istifadə etməklə vəd edilmiş artilleriya mərmilərinin Ukraynaya çatdırılmasını sürətləndirmək və ya Avropanın müdafiə müəssisələri vasitəsilə sursatların birgə alınmasını sürətləndirmək yollarını tapmağa çalışırlar ki, bu da çərçivə satınalma müqavilələri və Aİ üzv dövlətlərindən davamlı investisiyalar vasitəsilə sənaye potensialının genişləndirilməsini tələb edir.
“Tərəfdaş ölkələr də mühüm rol oynaya bilər və biz onları kollektiv səylərimizə qoşulmağa dəvət edirik… Həm qışda, həm də uzunmüddətli perspektivdə Ukraynanın müdafiəsini dəstəkləməyə və gücləndirməyə davam etmək qabiliyyətimiz çox vacibdir. Bu, bizim ümumi işimizdir. Avropanın təhlükəsizliyi və Ukrayna silahlı qüvvələrinin cəsur kişi və qadınları üçün bu, ölüm-dirim məsələsidir”, – məktubda deyilir.
Beş ölkənin liderləri qeyd ediblər ki, Rusiya heç kimi gözləmir, ona görə də indi hərəkətə keçmək lazımdır.
“Ukrayna uduzsa, uzunmüddətli nəticələr və xərclər hamımız üçün daha çox olacaq. Biz avropalıların xüsusi məsuliyyəti var. Ona görə də hərəkətə keçməliyik. Avropanın gələcəyi bundan asılıdır”, – deyə onlar çağırıblar.
Bundan əvvəl Almaniya kansleri Olaf Şolts ABŞ-ın yardımının dayana biləcəyindən ehtiyat edərək Avropa ölkələrini Ukraynaya silah tədarükünü artırmağa çağırıb.
Almaniya kanslerinin fevralın 1-də keçiriləcək Aİ sammitindən tərəfdaşları Ukraynaya daha çox silah göndərməyə çağırmaq üçün istifadə etmək istədiyi bildirilirdi.
Eyni zamanda, xarici işlər naziri Dmitri Kuleba miqrasiya məsələsində ikitərəfli fikir ayrılıqlarına baxmayaraq, ABŞ Konqresinin Ukraynaya əlavə maliyyə ayrılmasını təsdiqləyəcəyinə bir daha əmin olduğunu bildirib.
Gununsesi.info
