“Son dövrlər idarəetmənin bütün səviyyələrində həyata keçirilmiş struktur islahatları keyfiyyət baxımından yeni bir idarəçilik mexanizminin formalaşmasını hədəf götürüb. Bu ilin fevral ayında keçirilmiş növbədənkənar parlament seşkiləri də bu islahatların məntiqi davamıdır və demokratik inkişaf istiqamətində atılmış növbəti addım kimi dəyərləndirilməlidir. Parlamentin və onun komitələrinin rəhbərliyində müxalifət partiyalarının nümayəndələrinin təmsil olunması müstəqil Azərbaycan parlamentarizmi tarixində ilk dəfədir”.
Gununsesi.org Pravda.az-a istinadən xəbər verir ki, bunu Milli Məclis (MM) sədrinin müavini Fəzail İbrahimli deyib.
F.İbrahimli qeyd edib ki, aprelin 14-də ölkə başçısı İlham Əliyevin sədrliyi ilə 2020-ci ilin birinci rübünün sosial-iqtisadi yekunlarına həsr olunmuş müşavirədə ölkə başçısının söylədiyi proqram xarakterli geniş nitqi ölkə ictimaiyyətinin böyük marağına səbəb olmuş və kütləvi informasiya vasitələrində geniş əks-səda doğurub: “Ölkə Prezidentinin dərin məzmun və mahiyyət daşıyan çıxışında əslində dövlətimizin strateji kursunun ilin ilk 3 ayında atılan taktiki addımları ifadə olunurdu. Nəticələr onu göstərir ki, Prezident İlham Əliyevin böyük siyasi əzmlə başladığı çoxşaxəli islahatlar kursu ardıcıllıqla davam etməkdədir. Dünyanın yeni bir mərhələyə qədəm qoyduğu və hətta ən inkişaf etmiş ölkələrin böyük problemlərlə üzləşdiyi bir zamanda Azərbaycan öz dinamik inkişaf tempini qoruyub saxlayır. Bəşəriyyətin varlığını təhdid altına almış karonovirus təhlükəsi belə dövlətin iqtisadi inkişaf surətinə və siyasi sabitliyinə mane ola bilmir”.
F.İbrahimlinin sözlərinə görə, müşavirədə ölkə rəhbəri müqayisə üçün diqqəti belə bir məqama yönəldir ki, pandemiyadan xilas olmaq üçün 150-dən çox ölkə Beynəlxalq Valyuta Fonduna maliyyə yardımı ilə bağlı müraciət etdiyi halda Azərbaycanın adı bu siyahıda yoxdur: “Çünki əldə olunmuş sosial-iqtisadi tərəqqi bizə öz daxili resurslarımız hesabına istənilən problemi dəf etməyə, istənilən mürəkkəb vəziyyətdən üzüağ çıxmağa imkan verir. Prezidentin müvafiq sərəncamı ilə koronavirusla mübarizəyə 1 milyard manat vəsait ayrılmış, əlavə olaraq 2,5 milyard manatın da bu problemin həllinə cəlb olunacağı planlaşdırılır. Bu məqsədlə dövlət hesabına 6 müasir modul tipli xəstəxananın tikintisinə isə artıq başlanıb. Bu mənada Ümumdünya Səhiyyə Təşkilatının görülən işlərə yüksək qiymət verərək Azərbaycanı koronavirusla mübarizə sahəsində nümunəvi ölkə adlandırması isə çox fərəhləndiricidir. Koronavirusun hücumları qarşısında bir çox ölkələrin milli valyutaları duruş gətirə bilmədiyi halda, bizim manatın sabitliyi qorunub saxlanılmaqdadır. Məhz daxili siyasi sabitlik və iqtisadi stabillik Azərbaycanda səmərəli biznes mühitinin formalaşmasını şərtləndirən əsas meyarlardır. Təsadüfi deyil ki, məşhur “Heritage” Fondu iqtisadi azadlıqlarlar indeksinə görə Azərbaycanı dünya ölkələri sirasında 44-cü yerə layiq görüb”.
Millət vəkili nəzərə çatdırıb ki, pandemiyanın törətdiyi maneələrə baxmayaraq Azərbaycan beynəlxalq münasibətlərini inkişaf etdirməkdə davam edir: “Bu mənada ölkə başçısının təşəbbüsü ilə videokonfrans şəklində keçirilmiş və Azərbaycanın sədri olduğu Türkdilli Dövlətlərin Əməkdaşlıq Şurasının fövqəladə Zirvə görüşünü xüsusi qeyd etmək lazımdır. Bu tədbir Azərbaycan dövlətinin həmrəylik və qarşılıqlı etimada söykənən münasibətlər əsasında dünya siyasətinin nüfuzlu iştirakçısı olduğunu bir daha sübut etmiş oldu. Bütün bunlar onu deməyə əsas verir ki, cənab İlham Əliyev hər zaman olduğu kimi öz xalqına arxalanaraq bu gün də qətiyyətli addımlar atır, əhalinin rifah halının daha da yaxşılaşması üçün çox əhəmiyyətli qərarlar qəbul edir. Dövlətimizin qüdrətinə güvənən xalqımız da çətin gündə ölkə rəhbərliyi ilə daha möhkəm həmrəyliyk nümayiş etdirməklə öz məğrur obrazına yeni çalarlar gətirir”.
COMMENTS