İraq Türkiyədən “Bayraktar TB2” zərbə tipli pilotsuz uçuş aparatlarının (PUA) alınması barədə razılığa gəlib.
Gununsesi.info xəbər verir ki, bu barədə İraqın Müdafiə naziri Cuma İnad Sadun ölkənin “Əl-Şarkiye” telekanalına müsahibəsi zamanı məlumat verib.
Nazir Türkiyədən 12 ədəd “Atak” helikopteri, 6 ədəd “Koral” radioelektron mübarizə vasitələri alınacağını da bildirib.
Sadun PUA-larla bağlı “konsensusa gəldiklərini”, helikopteri almaq “niyyətində olduqlarını” və radioelektron mübarizə vasitələri “satın alma təklifini” göndərdiklərini bildirib.
Qeyd edək ki, Sadun keçən həftə İstanbulda baş tutan IDEF-21 müdafiə sərgisi zamanı Türkiyənin bir neçə müdafiə sənayesi şirkətinin rəsmiləri ilə görüşlər keçirib.
Türkiyənin “Baykar” şirkəti tərəfindən istehsal edilən “Bayraktar TB2” zərbə PUA-ları 24 saatdan çox havada qala, müşahidə apara və zərbələr endirə bilir. PUA-lar Azərbaycan, Qətər, Ukrayna və Polşa tərəfindən alınıb. “Bayraktar TB”lər Vətən Müharibəsi zamanı Ermənistan ordusunun məhv edilməsində önəmli rol oynayıb.
Gununsesi.info
