အောက်တိုဘာ ၁၁၊၂၀၂၆။သုည/People’s Spring
စစ်ကိုင်းတိုင်း မြောင်မြို့နယ်မှာ လူထုသပိတ်တိုက်ပွဲဦးဆောင်ကော်မတီက ဒေသခံပြည်သူတွေနဲ့အတူ ပူးပေါင်းပြီး လူထုခေါင်းဆောင် ဒေါ်အောင်ဆန်းစုကြည်လွတ်မြောက်ရေးနဲ့ သံအမတ်ကြီး ဦးကျော်မိုးထွန်းထောက်ခံရေး လူထုလှုပ်ရှားမှုတွေ အောက်တိုဘာ ၁၀ ရက်က ပြုလုပ်ခဲ့ကြပါတယ်။
မြန်မာပြည်သူလူထုကြုံတွေ့ ခံစားနေရမှုတွေ၊ အကြမ်းဖက်ဖိနှိပ်မှုတွေကို အမှန်တရားအတိုင်း လူထုကိုယ်စားပြုထုတ်ဖော်ပြောပြပေးနိုင်ဖို့ဆိုရင် ကုလသံအမတ်ကြီးအဖြစ် ဦးကျော်မိုးထွန်း ဆက်လက်တည်ရှိနေဖို့ အရေးကြီးတဲ့အတွက် မြောင်မြို့နယ် ဗိုလ်ချုပ်ကြေးရုပ်နဲ့ မြို့မစျေးတွေမှာ ထောက်ခံကြောင်း ပြသတဲ့ ဆိုင်းဘုတ်တွေကို မြောင်မြို့နယ်သပိတ်ကော်မတီဝင်တွေက စိုက်ထူခဲ့ပါတယ်။
ဒါ့အပြင် “Our UN Ambassador U Kyaw Moe Tun, The True Voice of Myanmar”၊ “ငါတို့ရဲ့သံအမတ်ကြီးသည် ငါတို့မြန်မာပြည်ရဲ့အသံဖြစ်သည်” စတဲ့စာသားတွေ ကပ်ခဲ့ပြီး ပြည်သူတွေအနေနဲ့ မိမိတို့ပါဝင်နိုင်တဲ့နည်းလမ်းတွေနဲ့ ဦးကျော်မိုးထွန်းကို ထောက်ခံကြောင်း ပြသမှုတွေ ပြုလုပ်ကြဖို့ကိုလည်း တိုက်တွန်းနှိုးဆော်ခဲ့ပါတယ်။
Public Service Announcement
အလားတူ မြောင်မြို့နယ် ကျေးရွာတစ်ရွာမှာလည်း သပိတ်ကော်မတီဝင်တွေနဲ့ တော်လှန်ပြည်သူတွေက လူထုခေါင်းဆောင်ဒေါ်အောင်ဆန်းစုကြည်ကို သူမရဲ့ မိသားစုနှင့် တွေ့ဆုံခွင့် ၊ စကားပြောခွင့်နဲ့ခြွင်းချက်မရှိ လွှတ်ပေးရေး လှုပ်ရှားမှုပြုလုပ်ခဲ့ပြီး Free Her ဆိုင်းဘုတ်တွေ စိုက်ထူကာ တောင်းဆိုမှု ပြုလုပ်ခဲ့ပါတယ်။
လူစည်ကားရာ လမ်းမကြီးထက်မှာ ဒေါ်အောင်ဆန်းစုကြည်ရဲ့ ရုပ်ပုံနဲ့အတူ “ကျွန်တော့်မေမေနဲ့ တွေ့ခွင့်ပေးပါ။ ကျွန်တော့်မေမေနဲ့ စကားပြောခွင့်ပေးပါ။ ကျွန်တော့်မေမေကို လွှတ်ပေးပါ” ဆိုတဲ့ စာသားပါ ဗီနိုင်းကပ်ပြီး FREE HER ကမ်ပိန်းကိုလည်း လုပ်ဆောင်ခဲ့ကြပါတယ်။
