တနင်္သာရီမြို့နယ်မှာ စစ်တပ်ဗုံးကြဲလို့ အမျိုးသမီး ၁ ဦး သေဆုံး

ဩဂုတ် ၅၊ ၂၀၂၆။ ထားမြတ်/People’s Spring

တနင်္သာရီမြို့နယ် လမိုင်းကော့ကျေးရွာကို စစ်တပ်က တိုက်လေယာဉ်နဲ့ ဗုံးကြဲတိုက်ခိုက်လို့ အသက် ၆၀ အရွယ်အမျိုးသမီး ၁ဦးသေဆုံးခဲ့ကြောင်း ကရင်အမျိုးသားအစည်းအရုံး(KNU) မြိတ်ထားဝယ်ခရိုင်က သတင်းထုတ်ပြန်ပါတယ်။

လမိုင်းကော့ရွာဟာ KNU အုပ်ချုပ်နယ်နယ်မြေ သတ်မှတ်ချက်အရ KNU မြိတ်ထားဝယ်ခရိုင်

‎လယ်မူလားမြိုနယ်ထဲမှာ ရှိတာပါ။ စစ်တပ်က လမိုင်းကော့ရွာကို ဩဂုတ် ၄ရက်ညနေပိုင်းမှာ ဗုံးကြဲခဲ့ရာ အမျိုးသမီး ၁ဦးသေဆုံးပြီး ၁ဦး ဒဏ်ရာရခဲ့တာပါ။

Public Service Announcement

ဒါ့အပြင် လေကြောင်း တိုက်ခိုက်မှုကြောင့် ပြည်သူလူထုနေအိမ် ၃လုံး ထိခိုက်ပျက်စီးခဲ့တယ်လို့ KNUက ထုတ်ပြန်ထားပါတယ်။

အာဏာသိမ်းစစ်တပ်ဟာ KNU ထိန်းချုပ်ဒေသတွေက ကျေးရွာတွေကို လေကြောင်းလက်နက်ကြီး တိုက်ခိုက်မှုတွေ ဆက်တိုက်ပြုလုပ်နေလို့ အရပ်သားသေဆုံးမှုတွေ မကြာခဏ ဖြစ်ပေါ်လျက်ရှိပါတယ်။

ဩဂုတ် ၂ရက်ကလည်း စစ်ကောင်စီက KNU ညောင်လေးပင်ခရိုင် ကျောက်ကြီးမြို့နယ် လယ်မူသောရွာကို လေကြောင်းဗုံးကြဲခဲ့လို့ စစ်ရှောင် ကလေးငယ်တွေအပါအဝင် ၄ဦး ဒဏ်ရာရခဲ့ပါတယ်။

ဇူလိုင် ၃၁ရက်ကလည်း စစ်တပ်က တောကြောင်ပေါက်ရွာကို လက်နက်ကြီးနဲ့ ပစ်ခတ်ခဲ့လို့ အသက် ၆၀ အရွယ် အမျိုးသားတဦး သေဆုံးခဲ့ရပါတယ်။

စစ်ကောင်စီတပ်ရဲ့ လူသားချင်းစာနာထောက်ထားမှု ကင်းမဲ့တဲ့ တိုက်ခိုက်မှုများကြောင့် အပြစ်မဲ့အရပ်သားပြည်သူများ၊ အထူးသဖြင့် ကလေးသူငယ်များမှာ အေးချမ်းသက်သာစွာ စာပေသင်ကြားရခြင်းမရှိဘဲ ထွက်ပြေးတိမ်းရှောင်နေရခြင်း၊ ထိခိုက်ဒဏ်ရာရရှိခြင်း၊ အသက်ဆုံးရှုံးခြင်းများနဲ့ ရင်ဆိုင်နေကြရကြောင်း KNUက ထုတ်ပြန်ခဲ့ပြီး ဒေသခံ ပြည်သူတွေဟာ စိုးရိမ်ကြောက်ရွံ့မှုတွေအောက်မှာ နေထိုင်နေကြရတယ်လို့ အသိပေးထားပါတယ်။