ဇူလိုင်-၂၇၊၂၀၂၆။ဖိုးသား/People’s Spring
မကွေးတိုင်းပေါက် နဲ့ မြိုင်ဒေသမှာ စစ်ကြောင်းထိုးလာပြီး လမ်းမှားကျန်ရစ်တဲ့ တပ်မ (၁၀၁)စစ်ကြောင်းကစစ်သားနှစ်ဦးကို လက်နက်ခဲယမ်းတွေနဲ့ဖမ်းမိခဲ့တယ်လို့ဂဠုန်ပြည်သူ့ကာကွယ်ရေးတပ်ဖွဲ့ (Myaing Garuda PDF )တာ၀န်ရှိသူက လူထုနွေဦးကို ပြောပါတယ်။
ပခုက္ကူတပ်မ(၁၀၁)ကအင်အား (၆၀၀)၀န်းကျင်ပါတဲ့ စစ်ကြောင်းဟာ ထောက်ရှာပင်ရွာကိုစစ်ကြောင်းထိုးချိန်စစ်ကြောင်းထဲက ရဲတပ်သားနှစ်ဦးက စစ်ကြောင်းကနေ ကျန်ရစ်ခဲ့ပြီး တောတွင်းတနေရာမှာ ၇ ရက်ခန့် မျက်စိလည်လမ်းမှားကျန်ရစ်ခဲ့တာလို့ ဆိုပါတယ်။
အဲဒီရဲနှစ်ဦးကရဲတပ်ရင်း(၁၁)ကဖြစ်ပြီးအစာငတ်ပြတ်ဖျားနာကာအနီး၀န်းကျင်မှာ ဆန်ထွက်တောင်းရင်း တွေ့ရှိတဲ့ပြည်သူတဦးက ကြောက်လန့်ထွက်ပြေးပြီး ဂဠုန်ပြည်သူ့ကာကွယ်ရေးတပ်ဖွဲ့ထံ အကြောင်းလာလို့ ဇူလိုင် ၇ ရက်နေ့က ဖမ်းမိခဲ့တာလို့ အသိပေးပါတယ်။
Public Service Announcement
စစ်ကောင်စီရဲနှစ်ဦးဆီကနေ MA2 တလက်၊ MA12 တလက်၊ ကျည်ဘောက် ၈ခု ကျည် ၃၀၀ ကျော်နဲ့ အခြားဆက်စပ်ပစ္စည်းတွေကို သိမ်းဆည်းရမိခဲ့တယ်လို့ သိရပါတယ်။
“သက်ဆိုင်ရာ တာဝန်ရှိတဲ့လူတွေစီအပ်လိုက်တာပါ။ သူတို့ပဲလိုအပ်တာစစ်ဆေးမေးမြန်းနေပါတယ်”လို့ Myaing Garuda PDF တာ၀န်ရှိသူက ဖမ်းမိခဲ့တဲ့ ရဲနှစ်ဦး အကြောင်းရှင်းပြပါတယ်။
ဒါ့အပြင်ကနဦးစစ်ဆေးချက်အရမြိုင်တောင်ပိုင်း ဇီးတောရွာမီးရှို့တာမှာပါ၀င်ခဲ့ကြောင်း ရဲနှစ်ဦးကဝန်ခံထားတယ်လို့သူကပြောပါတယ်။
ဒါ့အပြင်ဇူလိုင်၂ ရက်နေ့ကလည်းမြိုင်မြို့နယ်ကို စစ်ကြောင်းထိုးနေတဲ့ စစ်တပ် နေရာတွေကို နယ်မြေရှင်းလင်းစဥ် MA3 တလက် ကျည်ဘောက် ၃ ခု နဲ့ စစ်အသုံး အဆောင် ပစ္စည်းတွေ သိမ်းရခဲ့တယ်လို့ ဆိုပါတယ်။
အဆိုပါစစ်ကြောင်းဟာရွာတစ်ရွာကို မီးရှို့ဖို့ဝင်ရောက်စဥ် ဂဠုန်ပြည်သူ့ကာကွယ်ရေးတပ်ဖွဲ့ကထောင်ထားတဲ့ မိုင်းများထိ၍သေဆုံးထိခိုက်သူတွေရှိပြီး ဝရုန်းသုန်းကား ဆုတ်ခွာသွားစဥ် စစ်အသုံးအဆောင်းပစ္စည်းတွေကျန်ခဲ့တာလို့ ဖော်ပြထားပါတယ် ။
လက်ရှိမှာ အဲဒီစစ်ကြောင်းက ပေါက်နဲ့ မြိုင်အစပ်က တော်လှန်ရေးတပ်တွေ ထိန်းချုပ်ရာ ရေနံမြေဒေသတွေကိုဦးတည်နေပြီးနှစ်ဖက်တိုက်ပွဲတွေ မကြာခဏ ဖြစ်နေပါတယ်။
