ဇူလိုင် ၁၈၊ ၂၀၂၆။ ထားမြတ်/People’s Spring
ကချင်ပြည်နယ်၊ မိုးညှင်းမြို့နယ် အင်းတော်ကြီးဒေသတိုက်ပွဲမှာ စစ်တပ် လက်အောက်ခံ ရှမ်းနီတပ် (SNA)တပ်ဖွဲ့က အထိနာခဲ့ရာ တိုက်ပွဲမှာ ကျန်နေခဲ့တဲ့ ရုပ်အလောင်းတွေကို တော်လှန်ရေးတပ်တွေက ကောက်ယူပြီး ထုံးတမ်းအစဉ်အလာအတိုင်း နာရေးပြုလုပ်ပေးခဲ့တယ်လို့ ကချင်စစ်ရေး သတင်းရင်းမြစ်က ပြောပါတယ်။
ဇူလိုင်လလယ်မှာ အင်းတော်ကြီးဒေသ လုံးတုံရွာအနီးက SNA တပ်စခန်းအချို့ကို ဇူလိုင် ၁၆ရက် ညနေပိုင်းမှာ ကချင်လွတ်လပ်ရေးတပ်မတော်(KIA)နဲ့ KPDF ပူးပေါင်းတပ်က သိမ်းပိုက်နိုင်ခဲ့ရာ ရုပ်အလောင်းတွေ၊ လက်နက်တွေ သိမ်းရခဲ့တယ်လို့ သတင်းရင်းမြစ်က ပြောပါတယ်။
တိုက်ပွဲမှာ ကျန်နေခဲ့တဲ့ SNA ရုပ်အလောင်း ၆လောင်းကို ကောက်ယူပြီး ဒီကနေ့ ဇူလိုင် ၁၈ရက်မှာ ဗုဒ္ဓဘာသာ ထုံးတမ်းစဉ်လာအရ ကောင်းမွန်စွာသင်္ဂြိုလ်ပေးခဲ့တာလို့ ဒေသခံ သတင်းရင်းမြစ်အချို့က ရုပ်သံတွေ ဖော်ပြ အသိပေးပါတယ်။
Public Service Announcement
ဒါ့အပြင် တိုက်ပွဲဖြစ်ခဲ့တဲ့ ဟဲပန်ကျေးရွာက လက်နက်ကြီးထိမှန်ခဲ့တဲ့ နေအိမ် အချို့ကိုလည်း KPDFက ထောက်ပံ့ငွေပေးအပ်ခဲ့တယ်လို့ ဆိုပါတယ်။
အဲဒါနဲ့ပတ်သက်ပြီး ကချင်စစ်ရေးသတင်းရင်းမြစ်က “ အဲဒီသတင်းက အမှန်ပါ” လို့ ပြောပါတယ်။
ဒါ့အပြင် SNAတပ်က မဟုတ်မမှန် ဝါဒဖြန့်တာတွေ ရှိနေတယ်လို့လည်း ပြောပါတယ်။ လူမှုကွန်ရက်မှာ ရှမ်းနီအမည်ခံ စာမျက်နှာအချို့က ဝါဒဖြန့်သလို နေအိမ်တွေကို PDFက မီးရှို့တာမျိုး မရှိဘူးလို့ ပြောပြပါတယ်။
အင်းတော်ကြီးဒေသမှာ စစ်တပ်နဲ့ SNA တပ်တွေ ဆက်ရှိနေသေးတာမို့ တိုက်ပွဲတွေ ဆက်ရှိနိုင်တယ်လို့လည်း အခြားသတင်းရင်းမြစ်တဦးက ပြောပါတယ်။
အင်းတော်ကြီး အပါအဝင် ကချင်ဒေသတွင်း စစ်ရေး အခြေအနေတွေမေးမြန်းဖို့ KIA သတင်းပြန်ကြားရေးဌာနတာဝန်ခံ ဗိုလ်မှူးကြီးနော်ဘူထံဆက်သွယ်ထားဆဲဖြစ်ပြီး အဆက်အသွယ်မရသေးပါဘူး။
