ဇူလိုင်-၁၇၊ ၂၀၂၆။ ကတ်သရင်း/People’s Spring
မန္တလေးတိုင်း မြို့သုံးမြို့က ဗိုလ်ချုပ်အောင်ဆန်းရုပ်တု ၃ခုကို အာဏာသိမ်းစစ်တပ်က ဖျက်ဆီးသွားတယ်လို့ ဒေသခံတွေက ပြောပါတယ်။
မန္တလေးတိုင်းက စဉ့်ကူး၊ တကောင်း၊ မိုးကုတ်မြို့တို့က ဗိုလ်ချုပ်ရုပ်တုတွေကို စစ်တပ်က ဖျက်ဆီးယူဆောင်သွားတာလို့ ဒေသခံတွေက ပြောပါတယ်။
တကောင်းမြို့အဝင်က ဗိုလ်ချုပ်ရုပ်တုကို ဇူလိုင် ၁၅ရက် ညပိုင်းမှာ စစ်တပ်က တိတ်တဆိတ်ဖျက်ဆီးယူသွားတာလို့ သိရပါတယ်။
Public Service Announcement
မိုးကုတ်မြို့အနောက်ပိုင်းက ဗိုလ်ချုပ်အောင်ဆန်းရုပ်တုကိုလည်း ဇူလိုင် ၁၅ရက် ညပိုင်းမှာပဲ စစ်တပ်က လုံခြုံရေး အင်အားချ၊ မီးတွေ ပိတ်ကာ လာယူသွားတာလို့ သိရပါတယ်။
အလားတူပဲ စဉ့်ကူးမြို့က ဗိုလ်ချုပ်ရုပ်တုကို စစ်တပ်က လာရောက်ဖျက်ဆီးကာ ယူသွားတယ်လို့ ဒေသခံတွေက ပြောပါတယ်။
“စဉ့်ကူးလာဖျက်သွားတယ်ဆိုတာ ဟုတ်တယ်။ မနေ့ကပဲ သတင်းရတယ်။ မြို့ပေါ်က စကစအထိုင် များတော့ ဘယ်သူမှ မပြောရဲကြဘူး”လို့ ဒေသခံတစ်ဦးက ပြောပါတယ်။
အာဏာသိမ်းစစ်တပ်က အာဇာနည်နေ့မတိုင်ခင်မှာ မြို့တွေပေါ်က ဗိုလ်ချုပ်ရုပ်တုတွေကို ဆက်တိုက်ဖျက်ဆီးနေပြီး ခင်ဦးနဲ့ နွားထိုးကြီးမြို့က တော်လှန်ရေးတပ်တွေကတော့ ဗိုလ်ချုပ်ရုပ်တု ဖျက်ဆီးသူတွေကို ခွင့်လွှတ်မှာ မဟုတ်ဘူးလို့ ပြောဆိုထားပါတယ်။
