အညာဒေသများဖြစ်သည့် စစ်ကိုင်း၊ မကွေး၊ မန္တလေးနှင့် ရှမ်းမြောက်တို့တွင် ဖေဖော်ဝါရီအတွင်း တိုက်ပွဲ ၄၁၇ကြိမ်ဖြစ်ပွားခဲ့ပြီး စစ်ကောင်စီတပ်ဖွဲ့ဝင် ၆၄၉ ဦးသေဆုံးခဲ့ကြောင်း အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာနက သတင်းထုတ်ပြန်သည်။
အမှတ်(၁) စစ်ဒေသနယ်မြေများဖြစ်သည့် စစ်ကိုင်းတိုင်း၊ မကွေးတိုင်း၊ မန္တလေးတိုင်း၊ ရှမ်းပြည်နယ် မြောက်ပိုင်းတို့တွင် ဖေဖော်ဝါရီအတွင်း စစ်ရေးအခြေအနေကို ယနေ့ ထုတ်ပြန်လိုက်ခြင်းဖြစ်သည်။
အဆိုပါ တိုက်ပွဲများကို အမှတ်(၁)စစ်ဒေသကွပ်ကဲမှုအောက်ရှိ PDF၊ ပကဖနှင့် EROs ပူးပေါင်းအဖွဲ့များက ဆင်နွှဲခဲ့ခြင်းဖြစ်ကြောင်း ထုတ်ပြန်ခဲ့သည်။
တိုက်ပွဲပေါင်း ၄၁၇ ကြိမ်အနက်ထိတွေ့တိုက်ပွဲ ၁၆၂ ကြိမ်၊ PDF ဘက်မှ ပစ်ခတ်တိုက်ခိုက်မှု ၁၄၆ ကြိမ်၊ မိုင်းဆွဲတိုက်ခိုက်မှု ၇၃ကြိမ်၊ ဒရုန်းဖြင့်တိုက်ခိုက်မှု ၂၇ ကြိမ်၊ စစ်ကောင်စီတပ်မှ လေကြောင်းတိုက်ခိုက်မှု ၉ကြိမ် ရှိခဲ့သည်ဟု ဆိုသည်။
အဆိုပါတိုက်ပွဲများအတွင်း စစ်ကောင်စီတပ်ဘက်က ၇၅၆ ဦးဒဏ်ရာရခဲ့ကြောင်းလည်း ဖော်ပြသည်။
ပြည်သူ့ကာကွယ်ရေးတပ်မှ ရဲဘော် ၃၃ဦး ကျဆုံးပြီး ၉၇ဦး ဒဏ်ရာရခဲ့ကြောင်း ထုတ်ပြန်သည်။
ရန်သူ့ထံမှ လက်နက်မျိုးစုံ ၃၀လက်နှင့် ကျည်ခဲယမ်းများ သိမ်းဆည်းရရှိခဲ့ကြောင်း အသိပေးထားသည်။
ယခုနှစ် ဇန်နဝါရီတွင် တိုက်ပွဲဖြစ်ပွားမှု၊ တိုက်ခိုက်မှုပေါင်း ၃၆၀ ဖြစ်ပွားခဲ့ရာ ဖေဖော်ဝါရီတွင် တိုက်ပွဲဖြစ်ပွားမှု၊ တိုက်ခိုက်မှုများ ယခင်လထက် ပိုများလာကြောင်း NUG ကာကွယ်ရေး၏ ထုတ်ပြန်ချက်အရ သိရသည်။ဇန်နဝါရီအတွင်း၌ စစ်ကောင်စီတပ်က ၄၄၀ နီးပါးသေဆုံးခဲ့ရာ ဖေဖော်ဝါရီလတွင် စစ်ကောင်စီတပ် သေဆုံးမှုမှာ ၂၀၀ ဦးပိုများကြောင်းတွေ့ရသည်။
ကာကွယ်ရေးဝန်ကြီးဌာနအနေဖြင့် စစ်ရှိန်မြှင့်ဆောင်ရွက်မှုများ လုပ်ဆောင်လျက်ရှိရာ စစ်ကောင်စီလက်အောက်ခံတပ်သားနှင့် ရဲများ ပြည်သူ့ဘက် အမြန်ဆုံးပူးပေါင်းရပ်တည်ကြရန် အထူးတိုက်တွန်းချက် ထုတ်ပြန်ထားသည်။
