ဂန့်ဂေါတွင် စစ်ကောင်စီကြောင့် ကျဆုံးခဲ့သည့် ရဲဘော်နှင့်ပြည်သူ ၁၂၈ဦးအတွက် NUG ဘေးစီမံ ဝန်ကြီးဌာန ထောက်ပံ့ငွေပေးအပ်

မကွေးတိုင်း ဂန့်ဂေါမြို့နယ်အတွင်း အကြမ်းဖက် စစ်ကောင်စီလက်ချက်ကြောင့် ကျဆုံးခဲ့သည့် ရဲဘော်နှင့် ပြည်သူ ၁၂၈ဦးအတွက် အမျိုးသားညီညွတ်ရေးအစိုးရ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေး ဝန်ကြီးဌာနက ထောက်ပံ့ငွေပေးအပ်ခဲ့ကြောင်း ဂန့်ဂေါမြို့နယ် ပြည်သူ့အုပ်ချုပ်ရေးအဖွဲ့က ယမန်နေ့ သတင်းထုတ်ပြန်သည်။

ဂန့်ဂေါ ပြည်သူ့အုပ်ချုပ်ရေးအဖွဲ့သည် ဂန့်ဂေါမြို့နယ်အတွင်း စစ်ဘေးရှောင်နှင့် မီးဘေးသင့်ပြည် သူများ၊စစ်ကောင်စီ၏အကြမ်းဖက်မှုကြောင့် ထိခိုက်ဒဏ်ရာရရှိသူနှင့် ကျဆုံးသွားသူများ အတွက် ကူညီထောက်ပံ့မှုများ ဆောင်ရွက်လျက် ရှိရာဝန်ကြီးဌာန၏ ထောက်ပံ့မှုအဖြစ် ကျဆုံးရဲဘော်နှင့် ပြည်သူတစ်ဦးစီအတွက် ကျပ်တစ်သိန်းစီ စုစုပေါင်း ၁၂၈သိန်းကျပ် ပေးအပ်ခဲ့သည်ဟု အသိပေးထားသည်။

အဆိုပါ ထောက်ပံ့ငွေများကို ဂန့်ဂေါမြို့နယ် ပြည်သူ့အုပ်ချုပ်ရေးအဖွဲ့ ဒုတိယအဖွဲ့ခေါင်းဆောင်နှင့်အဖွဲ့ဝင်များ၊ ရပ်ကျေး(ပအဖ)များက ကွင်းဆင်းဆောင်ရွက် ပေးအပ်ခဲ့သည်ဟု ထုတ်ပြန် သည်။

ပြည်တွင်း၊ပြည်ပ အလှူရှင်များအနေဖြင့် ဂန့်ဂေါမြို့နယ် ပြည်သူ့အုပ်ချုပ်ရေးအဖွဲ့ထံ ပူးပေါင်းပါဝင် ကူညီပေးကြပါရန်လည်း တိုက်တွန်းနှိုးဆော်ထားသည်။

ဂန့်ဂေါမြို့နယ်အတွင်းရှိ ကျေးရွာများအနေဖြင့် အကြမ်းဖက် စစ်ကောင်စီတပ်၏ စစ်ကြောင်းထိုး ဝင်ရောက်ခြင်း၊ ကျေးရွာများကို စစ်ကောင်စီက မီးရှို့ဖျက်ဆီးခြင်း၊ လူထုပိုင် ပစ္စည်းများကို စစ်ကောင်စီတပ်နှင့် ပျူစောထီးများက ခိုးယူ၊ လုယူခြင်းစသည့် အကြမ်းဖက်မှုများစွာ ကြုံခဲ့ကြရပြီး လက်ရှိအချိန်ထိ တောထဲ၌ တိမ်းရှောင်နေရသူအများအပြားရှိနေသည်ဟု ဂန့်ဂေါမြို့နယ် မြင်သားရွာခံတစ်ဦးက ပြောသည်။

အချို့ရွာများမှာ ရွာလုံးကျွတ်မီးရှို့ဖျက်ဆီးခံရသည့် ရွာများရှိနေရာ ဒေသခံများအနေဖြင့် အခက် အခဲများစွာ ကြုံနေကြရဆဲဖြစ်ကြောင်း ၎င်းက ဆိုသည်။ မြင်သားရွာ၌ပင် အချို့မှာ ရွာသို့ ပြန်လည်နေထိုင်ကြသော်လည်း အချို့မှာ တောထဲ၌ တိမ်းရှောင်နေရဆဲဖြစ်သည်ဟု ပြောသည်။

မြင်သားရွာကိုလည်း စစ်ကောင်စီတပ်က အကြိမ်ကြိမ်ဝင်ရောက်ပြီး နေအိမ်များကို မီးရှို့ခြင်း၊ ကျေးရွာကာကွယ်ရေးတပ်ဖွဲ့ဝင်များနှင့် ကျေးရွာနေပြည်သူများကို သတ်ဖြတ်ခြင်း၊ ပြည်သူပိုင်ပစ္စည်းများယူဆောင်ခြင်းတို့ ကျူးလွန်ခဲ့သည်။