Qəzzaya sistemli hücumlar həyata keçirən və çox sayda insanın ölümünə səbəb olan İsrail baş naziri Netanyahunun oğluna etirazlar getdikcə artır.
Gununsesi.info xəbər verir ki, HƏMAS-a qarşı döyüşə könüllü qoşulan İsrail əsgərləri ölkənin baş naziri Benyamin Netanyahunun oğlunu ABŞ-da qalaraq ölkəsini “tərk etdiyinə” görə qınayıblar.
İngiltərənin ən çox oxunan qəzetlərindən biri olan “The Times” İsrailin ehtiyatda olan əsgərləri ilə söhbət edib… Xəbərin manşetində “İsrailin ehtiyatda olan əsgərləri Binyamin Netanyahunun oğlunun niyə Mayamidə olduğunu soruşurlar” yazılıb.
Ordu ölkə tarixindəki ən böyük səfərbərlikdə döyüşmək üçün 300.000-dən çox ehtiyatda olan əsgəri hərbi xidmətə çağırdıqdan sonra yüzlərlə israilli vətənə qayıdıb.
Netanyahunun böyük oğlu Yair bu ilin əvvəlində Floridaya köçüb və hələ də orada yaşayır. Hazırda 32 yaşında olan Yair Netanyahu 40 yaşına qədər ehtiyatda olan əsgər vəzifəsini daşıya bilər.
Təhlükəsizlik səbəbiylə adının açıqlanmasını istəməyən bir əsgər, “Mən cəbhədə olduğum müddətdə Yair “Mayami Beach”də həyatından zövq alır” deyib.
Livanın cənubunda İranın dəstəklədiyi “Hizbullah” tərəfindən getdikcə daha çox atəşə tutulan İsrailin şimal cəbhəsində xidmət etmək üçün könüllü olaraq xidmət edən əsgər hesab edir ki, ailənin yoxluğu sıralarda inamsızlıq və qəzəbi alovlandırır.
“Ailəmizi və ölkəmizi qorumaq üçün işimizi, ailəmizi, uşaqlarımızı tərk edən bizik, bu vəziyyətə görə məsuliyyət daşıyanlar deyil. Qardaşlarımız, atalarımız, oğullarımız hamısı cəbhəyə gedir, amma Yair hələ də burada deyil. Bu, ölkə hakimiyyətinə inamın formalaşmasına kömək etmir”, – deyə adını açıqlamayan əsgər bildirib.
Yair heç vaxt döyüşçü olmasa da, məcburi hərbi xidmətini başa vurub və İsrail Müdafiə Qüvvələrinin (IDF) sözçüsü bölməsində çalışıb.
Yair sosial media fəaliyyəti ilə bağlı mübahisələrdən sonra ABŞ-a köçüb.
Baş nazirin oğlu hökumətin məhkəmə islahatlarına qarşı nümayiş keçirən yüz minlərlə israillini “terrorçular” adlandırdıqdan və ABŞ-ı qiyamları maliyyələşdirməkdə ittiham etdikdən sonra ictimai rezonansa səbəb olub.
Yair bu yaxınlarda şəxsi “Instaqram” səhifəsini müharibə qurbanlarına və müharibə başlayandan bəri şimaldan və cənubdan köçmək məcburiyyətində qalan 120,000 və ya daha çox köçkün israillilərə dəstək olmaq üçün çalışan QHT-lər haqqında məlumatlılığın artırılmasına həsr edib.
Adının açıqlanmasını istəməyən və İsrailin HƏMAS-a qarşı cənub cəbhəsinə təyinat almağa hazırlaşan başqa bir könüllü belə deyib: “Mən Amerikadan qayıtdım, orada işim, həyatım və ailəm var idi. Bu, israillilər olaraq ən yaxın tariximizin ən birləşdirici anıdır və baş nazirin oğlu da daxil olmaqla, hər birimiz hazırda burada olmalıyıq”.
Netanyahu sentyabrdakı son paylaşımında ABŞ-ın Nyu-York şəhərində poza verib. Bu yazıdan sonra Netanyahu daha çox Həmas-İsrail müharibəsi ilə bağlı paylaşımlar etməyə başlayıb.
Səid Əhmədli
Gununsesi.info
