ဧပြီ-၂၃၊ ၂၀၂၆၊ မေရီ၊ ဆိုင်းမင်း / People’s Spring
မန္တလေးမြို့၊ ပုသိမ်ကြီးမြို့နယ်မှာ မနေ့ ဧပြီ ၂၂ရက် ညကတိုက်ခတ်ခဲ့တဲ့လေပြင်းကြောင့် သစ်ပင်တွေပြိုလဲပြီး ၁၁။ နှစ်အရွယ် ကလေးတစ်ဦး သစ်ပင်ပိမိပြီး သေဆုံးခဲ့ပါတယ်။
ဧပြီ ၂၂ ရက် ည ၁၁နာရီခန့်က ပုသိမ်ကြီးမြို့နယ်၊ မန္တလေး-ပြင်ဦးလွင်လမ်း၊ သမ္မတောကျေးရွာနဲ့ ကျောက်မီးကျေးရွာကြားမှာ မိုးရွာပြီး လေပြင်းတိုက်ခတ်ခဲ့တာကြောင့် သစ်ပင်တွေပြိုလဲခဲ့တာပါ။
အဲဒီလမ်းပိုင်းမှာရှိတဲ့ ကြူဝန်ကျေးရွာမှာတော့ နေအိမ်တစ်လုံးပေါ် သစ်ပင်တစ်ပင်လဲပြိုကျခဲ့တာကြောင့် နေအိမ်အတွင်းရှိ ၁၁နှစ်အရွယ် မိန်းကလေးတစ်ဦးသေဆုံးခဲ့ကြောင်း ဒေသတွင်း လူမှုကူညီရေးလုပ်ကိုင်နေသူတွေက ပြောပါတယ်။
Public Service Announcement
“ ညက လေရော၊ မိုးရော အတော်ကြမ်းသွားတယ်၊ ကလေးကအိမ်ထဲအိပ်နေတာ၊ သစ်ပင်ပိတော့ ညှပ်သွားတဲ့သဘောပါ” လို့ လူမူကူညီရေး လုပ်ကိုင်သူတစ်ဦးကပြောပါတယ်။
အဲဒီဖြစ်စဉ်မှာ သေဆုံးသူကလေးငယ်ရဲ့ မိသားစုဝင်တွေဖြစ်ကြတဲ့ အခြားကလေးငယ်တစ်ဦးအပါအဝင်သုံးဦးလည်း ထိခိုက်ဒဏ်ရာတွေရရှိခဲ့တယ်လို့ သိရပါတယ်။
“ ဆုံးသွားတာက အကြီးမလေး ၊ထိခိုက်ဒဏ်ရာရတာက သူမိဘနဲ့ ညီမလေးတွေပါ “ လို့ လူမူကူညီရေးလုပ်ကိုင်သူက ဆိုပါတယ်။
ဒဏ်ရာရသူတွေဟာ အသက် ၅၆ နှစ်အရွယ် အမျိုးသမီးတစ်ဦး၊ အသက် ၃၂ နှစ်အရွယ် အမျိုးသမီးတစ်ဦးနဲ့သုံး နှစ်အရွယ် မိန်းကလေးတစ်ဦးတို့လည်း ဒဏ်ရာရရှိခဲ့ကြောင်း ဒေသခံတွေက ပြောပါတယ်။
“ ပုသိမ်ကြီးဘက် လေပြင်းကြောင့် အိမ်တွေခေါင်မိုးလန်တယ်။ သစ်ပင်ကျိုးတယ်။ ဓာတ်တိုင်တွေလည်း ကျိုးတယ်” လို့ ဒေသတွင်းလူမူကူညီရေးလုပ်ကိုင်နေသူတစ်ဦးက ပြောပါတယ်။
လေပြင်းတိုက်ခတ်မှုကြောင့် မန္တလေး-ပြင်ဦးလွင်လမ်းမကြီးပေါ်ရှိ သစ်ပင်တွေ ကျိုးကျပြီး လမ်းပိတ်ဆို့မှုတွေပါ ဖြစ်ပွားခဲ့တယ်လို့ ဒေသခံတွေဆီက သိရပါတယ်။
