မကွေးတိုင်း၊ ပခုက္ကူခရိုင်၊ ပေါက်မြို့နယ်ရှိ ရေပြာကျေးရွာစစ်ဆေးရေးဂိတ်ကို အနီးကပ်ဝင်ရောက်တိုက်ခိုက်ရာ ရဲတစ်ဦးသေဆုံးပြီး သေနတ်တစ်လက်နှင့် ကျည်များ သိမ်းဆည်းနိုင်ခဲ့ကြောင်း ဒေသတွင်းတော်လှန်ရေးအင်အားစုများက သတင်းထုတ်ပြန်သည်။
ယနေ့ (သြဂုတ်၂၂ ရက်)နံနက် ၇ နာရီခွဲခန့်က ပေါက်မြို့နယ်၊ ရေပြာကျေးရွာစစ်ဆေးရေးဂိတ်အား “နောင်ရိုး စစ်ဆင်ရေး”အဖြစ် အနီးကပ်ဝင်ရောက်တိုက်ခိုက်ခဲ့ကြောင်း မြိုင်(ပကဖ)အဖွဲ့က ပြောသည်။
တိုက်ခိုက်မှုမှာ မိနစ် ၂၀ ကျော်ကြာမြင့်ခဲ့ပြီး ရဲတစ်ဦးသေဆုံးပြီး G3 သေနတ်တစ်လက်၊ ကျည် ၁၇၁ တောင့်၊ ဖုန်းတစ်လုံးနှင့် ဆိုင်ကယ်၂စီးနှင့် စစ်အသုံးအဆောင်ပစ္စည်းများ သိမ်းဆည်းနိုင်ခဲ့ကြောင်း မြိုင်(ပကဖ)အဖွဲ့က အသိပေးသည်။
“စကစလာရင် များများသေတယ်။ အရင်က ခြောက်ဦး၊ ခုမနက်က သုံးဦးတည်းလာတာ။ ညတွေဘာတွေမအိပ်ဘူး။ ရေပြာစခန်းပြန်တာ။ နှစ်ကောင်ကပြေးတယ်။ တစ်ကောင်သေတာ ခုညအထိ အလောင်းမကောက်ဘူး။”ဟု မြိုင်(ပကဖ)အဖွဲ့ခေါင်းဆောင် ဗိုလ်လက်ယျာက ပြောသည်။
ထို့အပြင် ကျန်ရဲများလည်း ထိခိုက်ဒဏ်ရာများဖြင့် ထွက်ပြေးသွားကြောင်း သိရသည်ဟု ဆိုသည်။
“ရေပြာက လမ်းဆုံ၊ အချက်အချာကျတဲ့နေရာကို ဝင်တိုက်သွားတာ။”ဟု ဒေသခံတစ်ဦးက ပြောသည်။
ယင်းစစ်ဆင်ရေးအား ASTF (Pauk)တပ်ဖွဲ့၊ မြိုင် ပကဖ ရင်း၁ – စိတ် ၁၈၊ NPRF တပ်ဖွဲ့ ၊ Fire Revolution Group (ခရိုင်ရင်း ၁၆) ၊ ပခုက္ကူမြို့ပြပျောက်ကြားတပ်ဖွဲ့ ၊ ဗိုလ်ဗျတ္တနှင့်နွေဦးလေပွေတပ်ဖွဲ့၊ Justic Fighter တပ်ဖွဲ့၊ကင်ဒိုပြည်သူ့ကာကွယ်ရေးတပ်ဖွဲ့၊ အဆိုတော်တပ်ဖွဲ့ ၊ ဆိုင်ကလုန်းပျောက်ကြားတပ်ဖွဲ့၊ ဗိုလ်လရောင်တပ်ဖွဲ့တို့မှ ပူးပေါင်းပါဝင်တိုက်ခိုက်ခဲ့ကြောင်း အသိပေးထားသည်။
ပြီးခဲ့သည့် ၂၀၂၂ ဖေဖော်ဝါရီ၂၁ ရက်ကလည်း ရေပြာရွာစစ်ကောင်စီစခန်းကို ဝင်ရောက်တိုက်ခိုက်ရာ စစ်အုပ်စု ထိခိုက်သေဆုံးမှုများပြားပြီး ပြည်သူ့ရဲဘော် နှစ်ဦးလည်း ကျဆုံးခဲ့သည်။
