တော်လှန်ရေးအတွက် ပြည်ပထောက်ပံ့မှုတွေ လိုအပ်တယ်လို့ CIA သုံးသပ်

အမေရိကန် ဗဟိုထောက်လှမ်းရေး အေဂျင်စီ (CIA)ရဲ့ ၂၀၂၃ ခုနှစ်အတွက် နိုင်ငံတကာရေးရာ အကဲဖြတ် အစီရင်ခံစာမှာ မြန်မာ့တော်လှန်ရေး အောင်မြင်ဖို့အတွက် ပြည်ပ အထောက်အပံ့တွေ မဖြစ်မနေ လိုအပ်လိမ့်မယ်လို့ သုံးသပ် ဖော်ပြထားပါတယ်။

စစ်တပ်က အာဏာသိမ်းခဲ့တဲ့နောက်ပိုင်း စစ်အာဏာရှင်တွေနဲ့ ဒီမိုကရေစီကို လိုလားတဲ့ အတိုက်အခံ အင်အားစုတွေကြား လက်နက်ကိုင် ပဋိပက္ခတွေ အရှိန်မြင့်လာပြီး လက်ရှိ ၂ နှစ်ကျော် ကြာလာတဲ့ထိ ဘယ်ဖက်ကမှ အချိန်တို ကာလအတွင်း အနိုင်ရမယ့် လက္ခဏာမျိုး မတွေ့သေးဘူးလို့ CIAက ဆိုပါတယ်။

နောက်ပြီး နှစ်ဖက်စလုံးက သူတို့ရဲ့ ရှင်သန် ရပ်တည်ရေးကို အထူးအလေးထား ဆုပ်ကိုင်ထားရတာကြောင့် အလျှော့ပေးမယ့် အလားအလာ မရှိကြဘူးလို့လည်း CIAက ဆက်လက် သုံးသပ်ထားပါတယ်။ ​တော်လှန်​ရေးအဖွဲ့​တွေက ပြတ်သားတဲ့ အနိုင်ရလဒ် ပေါ်လွင်လာဖို့ဆိုရင် တပ်ထဲမှာ အကြီးစား သဘောထား ကွဲလွဲမှု ဖြစ်တာမျိုး၊ ဒါမှမဟုတ် ထင်ရှားတဲ့ ပြည်ပ အထောက်အပံ့တွေ ကြားဝင်လာတာမျိုး အပြောင်းအလဲကြီးတွေ လိုအပ်လိမ့်မယ်လို့လည်း ဆိုထားပါတယ်။

ဒီအပြောင်းအလဲတွေ ရှိလာမှသာ စစ်အာဏာရှင် ဆန့်ကျင်ရေး အင်အားစုတွေအတွက် စစ်ရေးအရ အနိုင်ရတာ၊ ဒါမှမဟုတ် မူဝါဒရေးရာ သဘောတူညီမှုတစ်ရပ် ဖော်ဆောင်နိုင်တာမျိုး အခြေအနေကောင်းတွေဆီ တွန်းအားပေးနိုင်မယ်လို့ CIA အစီရင်ခံစာကဆိုပါတယ်။

နောက်ပြီး လက်ရှိ ဖြစ်ပေါ်နေတဲ့ အကြမ်းဖက် လုပ်ရပ်တွေရယ်၊ နိုင်ငံရဲ့ စီးပွားရေး အခြေအနေ ယုတ်လျော့ ကျဆင်းလာတာရယ် ပေါင်းပြီး လူသားရေးရာ အကျပ်အတည်းတွေ၊ လူ့အခွင့်အရေး ပြဿနာတွေက ပိုမို ဆိုးရွားလာပြီး မြန်မာနိုင်ငံအပြင် ဒေသတစ်ခုလုံးရဲ့ လုံခြုံရေး ကဏ္ဍမှာပါ ထိခိုက် သက်ရောက်မှုတွေ ရှိလာနိုင်တယ်လို့လည်း CIAက ကောက်နုတ် သုံးသပ်ပြထားခဲ့ပါတယ်။