Xarici İşlər Nazirliyi: "Elmar Məmmədyarovun ABŞ-da mənzil alması şəxsi məsələsidir"

Azərbaycanın Xarici İşlər naziri Elmar Məmmədyarovun ailə üzvlərinin ABŞ-ın Nyu-York şəhərində dəbdəbəli mənzil alması barədə xəbərin təsdiqlənməsi sosial şəbəkələrdə böyük müzakirələrə səbəb olub.

Gununsesi.org xatırladır ki, 2015-ci ilin yayında nazirin böyük oğlu Emin Məmmədyarov Manhettendə ümumilikdə 4,2 mln. ABŞ dollarından bir qədər çox nağd pul ödəməklə bir yox, iki mənzil alıb. Əvvəlki məlumatlarda onun bir mənzil aldığı qeyd edilirdi.

“Mənzil Nyu Yorkun Riverside Boulevard 120 ünvanındakı elitar binadadır və nazirin oğluna Fox Ledge LLC və Silver Fox Manhatten LLC əmlak şirkətləri tərəfindən satılıb. Mənzilin 2009-cu ildə dəyəri 1 792 000.00 dollar olub”.

Həmçinin bəlli olub ki, 2015-ci ilin iyun-iyul aylarında Emin Məmmədyarov Riversayd bulvarı, Tramp-Pleysdəki binalarda iki mənzil (PH2K və PH3K) alıb.

Azadlıq radiosunun əməkdaşı Xarici İşlər Nazirliyindən nazirin illik maaşının 30 min manat olduğunu nəzərə alaraq, məmmədyarovların bu qədər baha qiymətə olan mənzili necə almasına dair suala aydınlıq gətiməsini xahiş edib.

Ancaq nazirliyin mətbuat xidmətinin rəhbəri Leyla Abdullayeva “Xarici işlər nazirinin və nazirlikdə işləyən şəxslərin şəxsi məsələsini şərh edə bilmərəm”.

Gununsesi.org