Çinlə suverenlik mübahisəsi olan Tayvanda bu gün keçirilən prezident və parlament seçkiləri öncəsi adanın ətrafında iki Çin yüksək hündürlük şarının göründüyü bildirilib.
Gununsesi.info xəbər verir ki, Tayvan Müdafiə Nazirliyinin sosial paylaşma saytı X hesabında edilən açıqlamaya görə, dünən axşamdan bu gün səhər saatlarına qədər adanın şimal və cənubunda 2 yüksək hündürlükdə balon aşkar edilib.
Tayvan boğazında tərəflərin təsir zonalarını məhdudlaşdıracağı güman edilən hava və dəniz xətti olan “orta xətt”dən kənara uçan şarlardan biri şərqə dönərək adanın üzərindən keçib, digəri isə şimal sahilində havaya qalxıb. Nazirlik həmçinin bildirib ki, bu gün səhər saatlarından etibarən adanın ətrafında Çin ordusuna aid 8 hərbi təyyarə və 6 döyüş gəmisi görünüb.
Tayvanda seçkilər öncəsi Çinin yüksək hündürlükdə şarlarının ada ətrafında uçuşlarının artdığı müşahidə edilir.
Müdafiə Nazirliyinin yazılarında ilk dəfə qeyd olunan 17 dekabr 2023-cü ildən bəri adanın ətrafında aşkar edilən yüksək hündürlükdə hava şarlarının sayı 37-yə çatıb. İlin əvvəlindən bəri hər gün ən azı bir Çin hava şarının uçuşu qeydə alınıb.
Şarların elektron kəşfiyyat avadanlığı daşıdığından şübhələnilsə də, uçuşlar Pekin administrasiyasının seçki prosesi zamanı ani kəşfiyyat məlumatlarının toplanması səylərini sürətləndirdiyinə işarə kimi şərh edilir. Şarların aktivliyinin artması həm də Pekinin seçki prosesi zamanı ada əhalisinə təsir etmək və suverenlik iddiasını vurğulamaq məqsədi daşıyan hərəkəti kimi qiymətləndirilir.
Çin Xarici İşlər Nazirliyinin sözçüləri hava şarlarının olması ilə bağlı suallara vəziyyətdən xəbərsiz olduqlarını və məsələnin xarici əlaqələrlə heç bir əlaqəsi olmadığını cavablandırırlar.
Çinin ərazisinin bir hissəsi olduğunu iddia etdiyi Tayvan 1949-cu ildən de-fakto müstəqilliyə malikdir. Vətəndaş müharibəsindən sonra materik Çin və Tayvan arasında yaranan ayrılıq hələ də davam edir. Son illərdə Tayvana hərbi təzyiqlərini artıran Pekin administrasiyası, adanın materiklə birləşdirilməsi üçün lazım gələrsə, güc tətbiqini istisna etməyəcəyini vurğulayır.
Gununsesi.info
