Belqorod vilayətində qəzaya uğrayan Rusiyaya məxsus İl-76 nəqliyyat təyyarəsinin göyərtəsində olanların hamısı həlak olub.
Gununsesi.info bildirir ki, bu barədə vilayətin qubernatoru Vyaçeslav Qladkov özünün Telegram kanalında məlumat verib.
“Koroçanski rayonunda nəqliyyat təyyarəsi qəzaya uğrayıb. O, yaşayış məntəqəsinin yaxınlığındakı tarlaya düşüb. Təyyarədə olanların hamısı öldü. Bütün əməliyyat xidmətləri qəza yerindədir, əməliyyat-istintaq tədbirləri aparılır”, – qubernator yazıb.
Onun sözlərinə görə, fəlakətin səbəblərini müəyyən etmək üçün hadisə yerinə komissiya göndərilir.
Bundan əvvəl Rusiya Dövlət Dumasının sədri Vyaçeslav Volodin palatanın plenar iclası zamanı Rusiya Aerokosmik Qüvvələrinin İl-76 təyyarəsinin qəzaya uğraması ilə bağlı ABŞ Konqresi və Bundestaqına müraciət hazırlamağı tapşırıb .
Öz növbəsində, Rusiya prezidentinin mətbuat katibi Dmitri Peskov İl-76 təyyarəsinin Belqorod yaxınlığında qəzaya uğraması ilə bağlı məlumatı hələlik şərh etməyib.
“Bu kifayət qədər yeni məlumatdır, indi bununla məşğul olacağıq. Hələlik heç nə deyə bilmərəm”, – Kremlin sözçüsü bildirib.
Dövlət Dumasının Müdafiə Komitəsinin rəhbəri Andrey Kartapolov bəyan edib ki, ukraynalı hərbi əsirlərin olduğu təyyarə Ukrayna Silahlı Qüvvələri tərəfindən Amerikanın “Patriot” zenit-raket kompleksindən və ya Almaniyanın İRİS-T-dən olan raketlərlə vurula bilərdi.
Daha əvvəl Rusiya Müdafiə Nazirliyi göyərtəsində 74 nəfərin olduğu Rusiya Aerokosmik Qüvvələrinə məxsus İl-76 təyyarəsinin Belqorod vilayətində qəzaya uğraması barədə məlumat yayıb.
“Yanvarın 24-də Moskva vaxtı ilə saat 11:00 radələrində İl-76 təyyarəsi planlı uçuşu yerinə yetirərkən Belqorod vilayətində qəzaya uğrayıb”, – məlumatda deyilir.
Təyyarənin göyərtəsində mübadilə üçün Belqorod vilayətinə aparılan Ukrayna Silahlı Qüvvələrinin əsir götürülmüş 65 hərbçisi, altı ekipaj üzvü və onları müşayiət edən üç şəxs olub.
Təbii fəlakətin səbəbləri hələlik rəsmi olaraq açıqlanmayıb.
Bu arada Ukrayna Müdafiə Qüvvələrindəki mənbə RBC-Ukraynaya bildirib ki, Belqorod vilayətində qəzaya uğrayan İl-76 hərbi-nəqliyyat təyyarəsi çox güman ki, S-300 kompleksləri üçün raket daşıyıb.
Mənbə qeyd edib ki, rus qoşunları Xarkov şəhəri və Xarkov vilayətinə hücum edərkən məhz bu komplekslərdən istifadə edirlər.
“İnterfaks-Ukrayna” agentliyinə Ukrayna Müdafiə Nazirliyinə yaxın məlumatlı mənbə bildirib ki, Rusiyaya məxsus İL-76 təyyarəsi havaya qalxarkən vurulub.
Gununsesi.info
