Ekvador səlahiyyətliləri Meksika səfirliyinin binasına basqın edərək Ekvadorun keçmiş vitse-prezidenti Xorxe Qlası saxlayıblar.
Gununsesi.info-nun xəbərinə görə, hadisədən sonra Meksika Ekvadorla ikitərəfli əlaqələri dayandırdığını açıqlayıb.
Vətəni Ekvadorda korrupsiyaya görə iki dəfə məhkum olunmuş Qlas dekabr ayında siyasi sığınacaq istədiyi üçün Meksikanın Quitodakı səfirliyində qalırdı və onun xahişi cümə günü səhər tezdən Meksika tərəfindən qəbul edildi.
Meksika prezidenti Andres Manuel Lopez Obrador özünün X hesabında etdiyi paylaşımda Ekvador polisinin səfirlik binasına zorla girdiyini açıqlayıb.
Ekvador Prezident Aparatından verilən açıqlamada 2013-2017-ci illər arasında ölkədə vitse-prezident vəzifəsində çalışmış Qlasın saxlanıldığı bildirilib.
Keçmiş vitse-prezidentin aparıldığı məhkəmə binası ətrafında geniş təhlükəsizlik tədbirləri görüldüyü, məhkəmə binası ətrafında əsgərlərin növbətçi olduğu bildirilir.
Saxlanma hadisəsi Meksika ilə Ekvador arasında bir həftədir davam edən gərginliyin son nöqtəsi oldu. Ekvador Meksika prezidenti Lopez Obradorun bəyanatlarına istinad edərək, cümə axşamı günü Meksikanın Quitodakı səfirini persona non qrata elan edib.
Ekvador həmçinin Meksikanın Qlasın sığınacaq tələbini qəbul etməsinin qanunsuz cəhd olduğunu iddia edib.
Ekvador öz bəyanatında Meksikanı “keçmiş vitse-prezidenti qəbul edən diplomatik missiyaya verilən toxunulmazlıq və imtiyazlardan sui-istifadə etməkdə və ənənəvi hüquqi çərçivəni pozaraq diplomatik sığınacaq verməkdə” ittiham edib.
Lopez Obrador Meksikanın xarici işlər naziri Alisiya Barsenaya Ekvadorla diplomatik əlaqələri dayandırmağı tapşırdığını bildirib və həbsi “avtoritar” hərəkət, beynəlxalq hüququn və Meksikanın suverenliyinin pozulması adlandırıb.
Barcena qısa müddət sonra X sosial media platformasında Ekvador ilə diplomatik əlaqələrin “dərhal” dayandırıldığını elan etdi.
Ekvador səlahiyyətliləri Meksikadan səfirliyə girmək və Braziliyanın Odebrecht tikinti şirkətindən hökumət müqavilələri müqabilində rüşvət almaqda təqsirli bilinərək 2017-ci ildə 6 il həbs cəzasına məhkum edilmiş Qlası həbs etmək üçün icazə istəyib.
Başqa bir korrupsiya işi ilə bağlı barəsində həbs qətimkan tədbiri seçilən Qlas iddia edir ki, Ekvador hökuməti ona qarşı siyasi gündəmlə cinayət işi aparır.
Ekvador prezidenti Daniel Noboa keçən ilin sonunda vəzifəyə başladı və tez bir zamanda narkotik dəstələri ilə artan münaqişə ilə üzləşdi; Bu, onu bu ilin əvvəlində ümummilli fövqəladə vəziyyət elan etməyə vadar etdi və keçən ay onu uzatdı.
Afət Abbasova
Gununsesi.info
