Fransa prezidenti Emmanuel Makron Konstitusiya Şurasına yeni immiqrasiya qanununun konstitusiyaya uyğunluğunu yoxlamaq üçün müraciət edib. Qeyd edək ki, Makronun tərəfdaşlarının “sol qanadının” və sol təmayüllü siyasi qüvvələrin deputatlarının əksəriyyətinin ciddi narazılıqları var.
Gununsesi.info xəbər verir ki, bu barədə “Le Figaro” qəzeti məlumat yayıb.
Makron Konstitusiya Şurasına müraciəti ilə partiya yoldaşlarını barışdırmağa və ola bilsin ki, layihədən ən çox mübahisəyə səbəb olan məqamları çıxarmağa ümid edir.
Digər məsələlərlə yanaşı, bunlar uzunmüddətli miqrasiya kvotaları, qeyri-qanuni yaşayışın cinayət kimi tanınması və mühacirlərin Fransada məşğulluğundan və qalma müddətindən asılı olaraq sosial müavinətlərin dəyişkənliyidir.
Bundan əvvəl Baş nazir Elizabet Born və solçu siyasi qüvvələrin 60-dan çox deputatı da ayrı-ayrı tələblərlə Konstitusiya Şurasına müraciət ediblər.
Xatırlayaq ki, immiqrasiya qanun layihəsi Makron üçün son dərəcə vacibdir və onun qəbulu onun seçki vədlərindən biri idi. Ancaq əvvəlcə Milli Assambleya layihəni ümumiyyətlə baxılmaq üçün təqdim edə bilmədi – prezidentin partiyası sağçı “Respublikaçılar” ilə kompromislər axtarmalı oldu, nəticədə qanun layihəsi sərtləşdi.
Bu da öz növbəsində Makronun partiyasından olan bəzi deputatları qəzəbləndirib və hökumətdə parçalanmaya səbəb olub.
Gununsesi.info
