Avropa İttifaqının xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallas Azərbaycana səfər edib.
Gununsesi.info-ya danışan siyasi şərhçi Turan Rzayevin fikrincə, bu səfər hazırkı mərhələdə Aİ – Azərbaycan münasibətləri baxımından xüsusi əhəmiyyət daşıyır.
Onun sözlərinə görə, Avropa Parlamentinin 30 aprel tarixində Azərbaycanla bağlı qəbul etdiyi qətnamədən sonra yaranmış gərginlik fonunda Milli Məclisin də bu qurumla əlaqələri dayandırması fonunda Kallasın Bakıya səfəri tərəflər arasında dialoqun qorunması və münasibətlərin daha da kəskinləşməsinin qarşısının alınması baxımından vacib addımdır.
Kaya Kallas səfər zamanı Azərbaycanı Avropa İttifaqı üçün “dəyərli və etibarlı enerji tərəfdaşı” adlandıraraq Bakıda olmaqdan məmnunluğunu ifadə edib.
Turan Rzayev qeyd edir ki, hazırda Aİ ilə Azərbaycan arasında münasibətlər əsasən siyasi dialoq və praktiki əməkdaşlıq üzərində qurulub. Bu əməkdaşlıq enerji təhlükəsizliyi, nəqliyyat və təhlükəsizlik sahələrini əhatə edən institusional mexanizmlər vasitəsilə davam etdirilir.
Onun sözlərinə görə, Rusiya-Ukrayna müharibəsindən sonra Azərbaycanın Avropanın enerji təhlükəsizliyində rolu daha da artıb və Bakı bir çox Avropa ölkəsinin enerji təchizatında etibarlı tərəfdaş kimi mövqeyini gücləndirib. İtaliya kimi ölkələrlə enerji əməkdaşlığının genişlənməsi də bu tendensiyanın göstəricisidir.
Şərhçi həmçinin Azərbaycanın regional nəqliyyat və logistika layihələrində oynadığı rolu qeyd edərək, ölkənin Şərq–Qərb dəhlizi çərçivəsində Avropa üçün strateji əhəmiyyət daşıdığını bildirib.
Kaya Kallasın Ermənistanda keçirilən “Avropa Siyasi Birliyi” Zirvəsindən sonra Bakıya səfər etməsi də diqqət çəkən məqam kimi qiymətləndirilir.
Bu, Rzayevin fikrincə, Aİ-nin regionda balanslı yanaşma saxlamaq cəhdini göstərir.
Hazırda Azərbaycan və Ermənistan arasında sülh gündəliyinin irəlilədiyini vurğulayan siyasi şərhçi hesab edir ki, Avropa Parlamentinin qətnaməsi bu prosesə mənfi təsir göstərə biləcək addım kimi qiymətləndirilir.
Orxan
