စစ်ကောင်စီက တိုက်လေယာဉ်နှစ်စီးဖြင့် ပစ်ကူခဲ့ရဟုဆို
စစ်ကိုင်းတိုင်း၊ ထီးချိုင့်မြို့နယ်တွင် ယနေ့(ဩဂုတ် ၂၀ရက်) နံနက်က ဖြစ်ပွားသောတိုက်ပွဲအတွင်း ကချင်လွတ်လပ်ရေးတပ်မတော်(KIA)နှင့် PDF ပူးပေါင်းတပ် တိုက်ခိုက်မှုကြောင့် စစ်ကောင်စီစစ်ကြောင်းတစ်ခုလုံး ပိတ်မိခဲ့ပြီးအထိနာ၍ တိုက်လေယာဉ်နှစ်စီးဖြင့် ပစ်ကူခဲ့ရကြောင်း သတင်းရရှိသည်။
ထီးချိုင့်မြို့နယ်၊ ကွင်းကြီးကျေးရွာအနီးတောင်ရိုးတွင် ယနေ့ နံနက် ၇နာရီခန့်ကစ၍ တိုက်ပွဲအပြင်းအထန်ဖြစ်ပွားခဲ့ခြင်းဟု သိရသည်။ အင်အား ၆၀ခန့်ရှိသော စစ်ကောင်စီစစ်ကြောင်းကို KIAနှင့် PDF ပူးပေါင်းတပ်ဖွဲ့က ပိတ်ဆို့တိုက်ခိုက်ခြင်းဟု ပြည်သူ့ကာကွယ်ရေးထောက်ပို့ရဲဘော်တစ်ဦးက ပြောသည်။
“စစ်ကြောင်းကို ပိတ်ဆော်တာ။ အလောင်းကိုးလောင်း ရထားတယ်။ ခြင်းကျားတွေလည်းရတယ်။ ၁၁နာရီလောက်မှာ တိုက်လေယာဉ်နှစ်စီးနဲ့ လာပစ်သွားတယ်”ဟု ထီးချိုင့်မြို့မှ ပြည်သူ့ကာကွယ်ရေးထောက်ပို့ရဲဘော်က ပြောသည်။
တိုက်လေယာဉ် ဂျက်ဖိုက်တာနှစ်စီးသည် မြစ်ကြီးနားလေဆိပ်မှ တက်လာပြီး ကွင်းကြီးရွာပတ်ဝန်းကျင်ကို ပစ်ခတ်သွားခြင်းဟု တော်လှန်ရေးအင်အားစုများက ပြောသည်။
အဆိုပါ စစ်ကြောင်းသည် လက်ရှိအချိန်အထိ ကွင်းကြီးရွာအနီး၌ရှိနေသေးပြီး KIA၊ PDF ပူးပေါင်းတပ်ဖွဲ့က ဆုတ်ခွာပေးထားကြောင်း သတင်းရရှိသည်။
မြေပြင်ထိခိုက်မှုအခြေအနေကို မသိရှိရသေးပေ။ ယနေ့ တိုက်ခိုက်ခံရသော စစ်ကြောင်းသည် ထီးချိုင့်မြို့ပေါ်မှ ဆင်းလာပြီး ကွင်းကြီးကျေးရွာသို့ ဝင်ရောက်ရန်ပြင်ဆင်နေစဉ် KIA၊ PDF ပူးပေါင်းတပ်ဖွဲ့က တိုက်ခိုက်ခဲ့ခြင်းဟု တော်လှန်ရေးအင်အားစုများက ပြောသည်။
