ကရင်နီပြည်မှာ စစ်ကောင်စီ တိုက်လေယာဉ်တွေ ဗုံးမှားကြဲလို့ စစ်သား ၁၂ ယောက်ထက်မနည်း သေဆုံးလို့ထိုင်းသတင်းဌာန​ဖော်ပြ

မြန်မာ-ထိုင်းနယ်စပ် ကရင်နီ (ကယား)ပြည်နယ်ထဲမှာ ဖြစ်ပွားတဲ့ တိုက်ပွဲတစ်ခုအတွင်းမှာစစ်​ကောင်စီတပ်ကလေကြောင်းက ဗုံးမှားကြဲမိလို့ စစ်ကောင်စီ ကြည်းတပ်သား တစ်ဒါဇင်လောက် သေဆုံးခဲ့တယ်လို့ ထိုင်း PBS သတင်းဌာနက​​ဖော်ပြပါတယ်။

ဩဂုတ် ၅ ရက်က တိုက်ပွဲတွေ ပြင်းထန်နေချိန်အတွင်း ထိုင်းနယ်စပ်နဲ့ ကီလိုမီတာ ၃၀ (၁၈ မိုင်​ကျော်) လောက်အကွာမှာ တည်ရှိတဲ့ ကရင်နီ အမျိုးသား ကာကွယ်ရေးတပ်ဖွဲ့ (KNDF)၊ ကရင်နီ တပ်မတော် (KA)တို့ရဲ့ စစ်စခန်းတွေကို စစ်ကောင်စီရဲ့ တိုက်လေယာဉ် ၃ စီးက ဗုံးကြဲခဲ့ပါတယ်။

လေယာဉ်တွေ ကြဲချတဲ့ ဗုံးတွေက မြေပြင်မှာ ရှိနေတဲ့ သူတို့ရဲ့ တစ်ဖွဲ့တည်းသား စစ်ကောင်စီ ကြည်းတပ်သားတွေပေါ် တည့်တည့်ကျလို့ ၁၂ ယောက်လောက် သေဆုံးပြီး အများအပြား ဒဏ်ရာရခဲ့ကြောင်း ထိုင်းသတင်းဌာန PBSက ဆိုပါတယ်။

အဲဒီ လေကြောင်း တိုက်ခိုက်မှုတွေကြောင့် ကရင်နီ တော်လှန်ရေးတပ်သား ၂ ဦး ကျဆုံးပြီး ၇ ဦး အပြင်းအထန် ဒဏ်ရာရခဲ့ပါတယ်။ အဲဒီဒဏ်ရာရသူတွေကို တော်လှန်ရေး ရဲဘော်တွေက ထိုင်းဖက်ခြမ်းကို ပို့ဆောင်ပြီး ကုသပေးနေတယ်လို့ ထိုင်းမီဒီယာတွေက ဖော်ပြပါတယ်။

စစ်ကောင်စီနဲ့ ကရင်နီတပ်တွေ တိုက်ပွဲဖြစ်ချိန်တုန်းက ကရင်အမျိုးသား အစည်းအရုံး (KNU)ကလည်း ကရင်နီ ခုခံရေးတပ်တွေကို အကူအညီပေးဖို့ တပ်တွေ ဖြန့်ထားခဲ့ကြောင်း ထိုင်းPBSရဲ့ သတင်းကဆိုပါတယ်။

မြန်မာစစ်တပ်ဟာ ကရင်နီ တော်လှန်ရေးတပ်တွေသိမ်းပိုက်ထားတဲ့ စစ်​ကောင်စီရဲ့ စခန်းတွေကိုပြန် သိမ်းယူဖို့နဲ့ တော်လှန်ရေး အဖွဲ့တွေလက်ထဲ ကျရောက်သွားတဲ့ ၁၂၀ မမ မော်တာ ၇ လက်နဲ့ မော်တာကျည်ဆန် ၁၂၀၀၀ လောက်ကို ပြန်လည် ရယူနိုင်ဖို့ ထိုးစစ်ဆင်ခဲ့တာလို့ ဆိုပါတယ်။

စစ်ကောင်စီ တပ်သား ၃၀၀ ဝန်းကျင်လောက်ဟာ သံလွင်မြစ်ကို ဖြတ်ကူးနိုင်ခဲ့ပြီး နောက်ထပ် ၃၀၀ လောက်ကလည်း မြစ်ကိုဖြတ်ဖို့ ပြင်ဆင်ပြီး ကရင်နီ တော်လှန်ရေး တပ်တွေကို ထိုးစစ်ဆင်ဖို့ ကြိုးစားနေကြောင်း ထိုင်းမီဒီယာတွေက ဖော်ပြပါတယ်။

People’s Spring စုံစမ်းရရှိတဲ့ အချက်အလက်​တွေအရ

စစ်​ကောင်စီတပ်​မှ အင်အား ၃၀၀ ​လောက်ဟာ သံလွင်မြစ်အ​ရှေ့ဘက်ခြမ်းကို ဖြတ်ကူးနိုင်ခဲ့​ပေမယ့် ဖား​ဆောင်းမြို့နယ်ထဲမှာပဲရှိ​နေပြီး​တော့ မယ်စဲ့မြို့နယ်ကို ထိုး​ဖောက်မဝင်​ရောက်နိုင်ခြင်းမရှိဘူးလို့သိရပါတယ်။ စစ်​ကောင်စီတပ်​လေယာဥ်ဗုံးမှားကျဲတာ သိ​ပေမယ့် ဘယ်နှစ်ဦး​သေတယ်ဆိုတာမသိဘူးလို့ ကရင်နီစစ်​ရေးသတင်းရင်းမြစ်တစ်ဦးက​ပြောပါဘူး။

ပြီးခဲ့တဲ့ သီတင်းပတ်ကုန်က မြန်မာဖက်ခြမ်းမှာ ဖြစ်ပွားနေတဲ့ တိုက်ပွဲတွေဆီက ပေါက်ကွဲသံတွေ၊ ပစ်ခတ်သံတွေကို နယ်စပ်တလျှောက် ထိုင်းကျေးရွာတွေကပါ အတိုင်းသား ကြားနေခဲ့ရတယ်လို့လည်း သိရပါတယ်။

ထိုင်းနိုင်ငံ၊ မယ်ဟောင်ဆောင်မြို့ နယ်ခြားစောင့် တာဝန်ရှိသူတွေက တိုက်ပွဲတွေကြောင့် မြန်မာဖက်ကနေ ထွက်ပြေးခိုလှုံလာသူ စစ်ရှောင် ၃၈၈၆ ဦးကို ရပ်ကွက် ၃ ခုထဲက ယာယီ ဒုက္ခသည်စခန်း ၅ ခုမှာ နေရာချပေးထားကြောင်း ထုတ်ပြန်ထားပါတယ်။

ကရင်နီ ပူး​ပေါင်းတပ်​တွေဟာ ဇွန်အတွင်းမှာ မယ်စဲ့မြို့အပါအဝင် တစ်မြို့နယ်လုံးအတွင်းမှာရှိတဲ့ စစ်​ကောင်စီတပ်စခန်း​တွေအားလုံးကိုတိုက်ခိုက်သိမ်းပိုက်ခဲ့တာဖြစ်ပါတယ် ။

စစ်​ကောင်စီတပ်က ​လေ​ကြောင်းပစ်ကူအများအပြားနဲ့ စခန်း​တွေပြန်ရဖို့ကြိုးစား​ပေမယ့် နယ်ခြား​စောင့်တပ်စခန်း အနည်းငယ်ကိုသာ ကရင်နီတပ်​တွေက တိုက်ခိုက်ပြီး စခန်းမထိုင်ဘဲ ထားတဲ့အတွက် စစ်​ကောင်စီက ပြန်​နေရာယူနိုင်ခဲ့တယ်လို့ ကရင်နီ စစ်​ရေးသတင်းရင်းမြစ်အချို့က​ပြောပါတယ်။