စစ်ကောင်စီက ကန့်ဘလူမြို့နယ်၊ ပဇီကြီးရွာကို ဗုံးကျဲတိုက်ခိုက်မှုကြောင့် ပြည်သူရာနှင့်ချီသေဆုံးခဲ့ခြင်းအပေါ် ဖေစ်ဘွခ်တွင် ဝမ်းနည်းကြောင်း အနက်ရောင်ပရိုဖိုင်းပြောင်းသည်ကို စစ်ကောင်စီကရမည်ရှာကာ ဖမ်းဆီးခံခဲ့ရသည့် သတင်းစာဆရာ ဦးကျော်မင်းဆွေနှင့် အနုပညာရှင်လေးဦးကို ဇူလိုင် ၇ ရက်တွင်ပြန်လွှတ်ပေးခဲ့ကြောင်း ကာယကံရှင်များနှင့် နီးစပ်သူများကပြောသည်။
“July လ လေးက ညီမလေးအတွက် ကံကောင်းချင်းနဲ့ကျွန်တော့်အတွက် ပျော်ရွှင်ချင်းတွေ ပေးလိုက်ပြီ ကျေးဇူးပါ July ကျေးဇူးပါ” ဟု သရုပ်ဆောင် မေပန်းချီ၏ အစ်ကိုက၎င်းတို့မောင်နှမနှစ်ဦး၏ဓာတ်ပုံနှင့်အတူ ၎င်း၏ ဖေ့စ်ဘွတ်အကောင့်၌တင်ထားသည်။
ပဇီကြီးကျေးရွာဖြစ်စဉ် နှင့်ပတ်သက်၍ ဖမ်းဆီးခံရသည့် အနုပညာရှင်များအနက် သရုပ်ဆောင်မေပန်းချီသည် ဇွန်လအတွင်းက အလုပ်နှင့်ထောင်ဒဏ် သုံးနှစ် ကျခံရန်မတရား အမိန့်ချမှတ်ခံရသူဖြစ်သည်။
ထို့အတူ The Voice အယ်ဒီတာချုပ်ဟောင်းသတင်းစာဆရာ ဦးကျော်မင်းဆွေ မှာလည်း ပြန်လည်လွတ်မြောက်လာကြောင်းရင်းနှီးသူအချို့ကပြောသည်။ ရွှေရည်သိန်းတန် ၊ မြတ်သူသူ နှင့် မေလသံစဉ် တို့လည်း ပြန်လည်းလွတ်မြောက်လာသိရသည်။
မတရားဖမ်းဆီးခံရသူများကိုစစ်ကောင်စီက ပြည်သူရာချီသေဆုံးခဲ့သည့်ဖြစ်စဉ်အပေါ် ပရိုဖိုင်အနက်ချိန်းခြင်းအပါအဝင် ဝမ်းနည်းကြောင်းပြသသည်ဟုဆိုကာ ဧပြီလအတွင်းက မတရားဖမ်းဆီးခံခဲ့ရခြင်းဖြစ်သည်။
ကန့်ဘလူမြို့နယ် ပဇီကြီးကျေးရွာကို စစ်ကောင်စီက ဧပြီ ၁၁ ရက်တွင်ပြည်သူများစုဝေးနေသည့်နေရာကိုလေကြောင်းမှ ဗုံးကျဲတိုက်ခိုက်ခဲ့၍ ပြည်သူ ၁၆၈ ဦးသေဆုံးပြီး ၆၀ ကျော် ဒဏ်ရာရရှိခဲ့သည်။
(ပြန်လည်လွတ်မြောက်လာသောအနုပညာရှင်လေးဦးနှင့် သတင်းစာဆရာ)
