မကွေးတိုင်း ဂန့်ဂေါမြို့နယ် ဘော်ပြင်းကျေးရွာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ ဥက္ကဋ္ဌ အိမ်မှ စစ်ကောင်စီ အသုံးအဆောင်ပစ္စည်းများ၊ ဖောက်ခွဲရေးသုံးပစ္စည်းများ သိမ်းဆည်းရရှိခဲ့ကြောင်း ယောဒေသ ပြည်သူ့ကာကွယ်ရေးတပ်(YPDF)က သတင်းထုတ်ပြန်သည်။
ဘော်ပြင်းကျေးရွာရှိ ပြည်ခိုင်ဖြိုးဥက္ကဋ္ဌ ဦးစိန်မြင့်နေအိမ်ကို YPDF ရဲဘော်များက ဖေဖော်ဝါရီ ၁၉ရက်ညပိုင်း၌ ဝင်ရောက်ရှာဖွေရာနေအိမ်အတွင်းမှစစ်ယူနီဖောင်း(အစိမ်း)၁၇ စုံ၊ တိုက်ပွဲဝင်ယူနီဖောင်း (ပြောက် ကျား) ၄ စုံ၊ အရာရှိ လျှာထိုးဦးထုပ် ၁ လုံး၊ ရိုးရိုးဦးထုပ် ၄ လုံး၊ ကြယ် ၂ ပွင့်စီတပ်ထားသည့် ပခုံးတင် ဘား ၂ စုံ၊ ဟန်းကော ၁ လုံး၊ စစ်ဖိနပ် ၂ ရံနှင့် ဖောက်ခွဲရေးသုံးပစ္စည်းများ ရရှိခဲ့သည်ဟု ဆိုသည်။
တွေ့ရှိသည့် စစ်ယူနီဖောင်းများမှာ ဦးစိန်မြင့်၏သားဖြစ်သူ DSTA ကျောင်းဆင်း၏ ယူနီဖောင်းများ ဖြစ်သည်ဟု ယူဆရကြောင်း ဖော်ပြသည်။
ဦးစိန်မြင့်၏ မိန်းမဖြစ်သူမှာလည်းNon CDMကျောင်းဆရာမဖြစ်ကာ ရွာမှ ထွက်ပြေးနေသည်မှာ တစ်နှစ်ကျော်ကြာပြီဖြစ်ကြောင်း၊ ယခင်က ခလရ(၅၀)တွင် ခိုလှုံနေခြင်းဖြစ်ကြောင်း ဖော်ပြထားသည်။
လက်ရှိတွင်အဆိုပါ ပြည်ခိုင်ဖြိုးပါတီဥက္ကဋ္ဌနေအိမ်သို့ကျေးရွာ ပအဖ၊ ပကဖများ၏ ခွင့်ပြုချက်မရရှိဘဲ မည်သူမှ ဝင်ထွက်သွားလာခြင်း မလုပ်ကြရန် ကျေးရွာတွင်း သတိပေးထားပြီး မလိုက်နာပါက အရေးယူမည်ဟု ထုတ်ပြန်ခဲ့သည်။
