“Azərbaycan Dəmir Yolları” QSC-nin sədri Cavid Qurbanov mətbuata açıqlamasında Bakıda tramvayların fəaliyyətinin bərpa olunması haqqında düşnüldüyünü bildirib və qeyd edib ki, bununla bağlı biznes plan hazırlanır.
Maraqlıdır, Bakıda tramvay xətlərinin bərpası şəhər infrastrukturunun daha da yaxşılaşmasına, tıxac probleminə qarşı daha effektiv mübarizə aparmağa imkan verə bilərmi?
Gununsesi.org–un məlumatına görə, Moderator.az-a açıqlama verən yol-nəqliyyat məsələləri üzrə ekspert, hüquqşünas Ərşad Hüseynov buna çox böyük ehtiyac olduğunu vurğuladı:
“Travmay xətlərinin bərpası nəqliyyat infrastrukturunun təbii ki, yaxşılaşmasına səbəb ola bilər. 90-cı illərin sonlarında travmay xətlərinin sökülməsi yanlış addım idi. Uzaqgörənlik olmadı, ictimai nəqliyyat unuduldu. Bu gün isə onun acılarını yaşayırıq.
Tramvay xətlərini o vaxt sökəndə hamıya elə gəlirdi ki, hər kəsin fərdi avtomobili ooacaq və hər kəs istədiyi yerə fərdi avtomobili ilə gedəcək. Amma unutdular ki, bu, faktiki olaraq mümkün deyil. Ictimai nəqliyyat lazımdır. Ictimai nəqliyyatsız şəhər ola bilməz. Mükəmməl ictimai nəqliyyat olmalıdır. Avtobus, metro, tramvay, metrobus və s. kimi ictimai nəqliyyat vasitələrinin olması ancaq fayda verə bilər. Əslində bizim başqa çıxış yolumuz da yoxdur.
Çətin olacağı, bunun üçün çoxlu investisiya gərəkdiyi məlumdur. Bunun üçün zəruri məkan və zamanın da gərəkdiyi şübhəsizdir. Lakin ən azından şəhər ətrafında bu prosesi başlatmaq olar. Tramvay xətlərinin tədricən bərpasına çalışmaq lazımdır. Şəhərətrafı ərazilərlə şəhəri birləşdirən nöqtələrdə tramvayları tədricən bərpa eləmək olar. Bu, ekoloji baxımdan da faydalıdır.
İctimai nəqliyyatın çoxşaxəliyi fonunda fərdi nəqliyyatdan istifadə də azalır. Nəticədə, yollarda tıxac olmur, ətraf mühit az çirkləndirilir və s. Buna görə də ictimai nəqliyyata, tramvay nəqliyyatına alternativ yoxdur. Sadəcə, nisbətən az investisiya tutan, rahat başa gələn marşurutları seçib, iş görmək lazımdır”.
COMMENTS