İsrail açıq şəkildə Qəzzanın şimalına (təxminən 400 min insanın qaldığı) humanitar yardımın çatdırılmasına qarşıdır.
Gununsesi.info xəbər verir ki, bu barədə BMT-nin Fələstin ərazilərində humanitar məsələlər üzrə koordinatoru Lin Hastinqs bildirib.
O, BMT-nin Cenevrə ofisində videokonfrans vasitəsilə gündəlik brifinqdə deyib: “İsrail Qəzzanın şimalına (təxminən 400 min insanın qaldığı) humanitar yardımın çatdırılmasına açıq şəkildə qarşıdır”.
Mühasirəyə alınmış Qəzza zolağının 2 milyon 300 minə yaxın sakini İsrailin bombardmanlarından sığınacaq tapmağa çalışır və eyni zamanda qida, içməli su, dərman və yanacaq çatışmazlığından əziyyət çəkir.
İsrail administrasiyası 2007-ci ildən bəri Qəzza zolağını hava, quru və dəniz blokadası altında saxlayır və bu, bölgəyə lazımi ləvazimatların son dərəcə məhdud tədarükünə icazə verir.
Eyni zamanda, oktyabrın 7-də İsrail blokadanı gücləndirmək qərarına gəlib və hər hansı humanitar yardımın eksklava idxalına qadağa qoyub.
İsrail ordusu Misirlə Qəzza zolağının sərhədində yerləşən Rəfah sərhəd qapısına daxil olan istənilən avtomobili vuracağı ilə hədələyib. Bununla kifayətlənməyən İsrail qüvvələri sərhəd qapısının özünün yaxınlığında hücumlar təşkil etməklə hədələyib.
Beynəlxalq təzyiqlər artdıqca, İsrail hakimiyyəti güzəştə getdi və Qəzza zolağına çox simvolik humanitar yardımın gətirilməsinə icazə verib.
Belə ki, oktyabrın 21-də Rəfah keçid məntəqəsindən humanitar yardım daşıyan 20 yük maşınından ibarət ilk karvan keçib. Humanitar yardım daşıyan daha 14 yük maşını bazar günü, 20 yük maşını isə oktyabrın 23-də Qəzza zolağına daxil olub.
Eyni zamanda, BMT-nin məlumatına görə, Qəzza zolağının təxminən 2 milyon 300 min sakininin əsas ehtiyaclarını ödəmək üçün gündə ən azı 100 yük maşını göndərmək lazımdır.
Gununsesi.info
