အစ္စရေးက ဂါဇာကမ်းမြှောင်ဒေသမှာ ပါလက်စတိုင်း အရပ်သားတွေကို မညှာတာဘဲ စစ်ဆင်ရေး အရှိန်အဟုန် ဆက်မြှင့်နေမယ်ဆိုရင် လက်ရှိ ပဋိပက္ခဟာ ဂါဇာကို ကျော်လွန်ပြီး အရှေ့အလယ်ပိုင်း ဒေသတစ်ခုလုံးကို ပျံ့နှံ့ ကူးစက်တဲ့ စစ်ပွဲကြီး ဖြစ်သွားနိုင်တယ်လို့ ဟက်ဇ်ဘိုလာ ပြောက်ကျား ခေါင်းဆောင် တစ်ဦးက ခြိမ်းခြောက် သတိပေးသွားပါတယ်။
အစ္စရေးဟာ နိုင်ငံတောင်ပိုင်းက ဂါဇာမှာ ဟားမားစ် ပြောက်ကျားတွေနဲ့ စစ်ခင်း တိုက်ခိုက်နေရပြီး လက်ဘနွန်နဲ့ ထိစပ်နေတဲ့ မြောက်ပိုင်း နယ်စပ်မှာလည်း ဟက်ဇ်ဘိုလာတွေနဲ့ စစ်ရေးတင်းမာနေတဲ့ကြောင့် လုံခြုံရေး အစီအမံတွေ မြှင့်တင်ထားရပါတယ်။ ဟားမားစ်ရော၊ ဟက်ဇ်ဘိုလာပါ အစ္စရေးရဲ့ မဟာရန်သူ အီရန်က ကျောထောက်နောက်ခံ ပေးထားတဲ့ လက်နက်ကိုင် အင်အားစုတွေ ဖြစ်ပါတယ်။
ဟက်ဇ်ဘိုလာရဲ့ ဒုတိယ အကြီးအကဲဖြစ်သူ ရှိတ်ခ် နီယမ် ကာဆမ်က BBC သတင်းဌာနနဲ့ အင်တာဗျူးမှာ အစ္စရေး အနေနဲ့ ပါလက်စတိုင်း ပြည်သူတွေကို ဗုံးကြဲ တိုက်ခိုက်နေတာတွေ ရပ်တန်းက မရပ်ရင် ဂါဇာ စစ်ပွဲကနေ အရှေ့အလယ်ပိုင်း စစ်ပွဲအသွင်ကို ကူးပြောင်းသွားနိုင်ကြောင်း၊ အဲဒီ နောက်ဆက်တွဲ အကျိုးဆက်မျိုးကို ဘယ်သူမှ တားဆီးနိုင်မှာ မဟုတ်ကြောင်း ပြောကြားခဲ့ပါတယ်။
အစ္စရေးဟာ တကယ့် အန္တရာယ်ကောင် ဖြစ်ကြောင်း၊ အစ္စရေးက ကလေးတွေနဲ့ အမျိုးသမီးတွေ အပါအဝင် အရပ်သားတွေကို ရန်လို တိုက်ခိုက်မှုတွေ အရှိန်မြှင့်တင်နေပြီး အဲဒီအခြေအနေက ရှေ့ဆက် တိုးပွားလာဖို့ပဲ ရှိကြောင်း၊ ဒီလုပ်ရပ်မျိုးက ဒေသတစ်ခုလုံးအတွက် အန္တရာယ်တွေ ယူဆောင်ပေးလာနိုင်မှာ မဟုတ်ဘူးဆိုတာ သူ့အနေနဲ့ မယုံကြည်ကြောင်း ကာဆမ်က ဆိုပါတယ်။
အစ္စရေးရဲ့ လွန်ကဲတဲ့ လုပ်ရပ်တိုင်းမှာ တန်ပြန် သက်ရောက်မှုတွေ ရှိနိုင်ကြောင်း၊ အဲဒီအတွက် ဖြစ်နိုင်ခြေ ရှိသမျှ တုံ့ပြန်မှုတိုင်းကို တွေးထားသင့်ကြောင်းလည်း ကာဆမ်က သတိပေးသွားပါတယ်။
Public Service Announcement
အစ္စရေး ပိုင်နက်ကို ဟားမားစ်တွေက အလစ်အငိုက် ကျူးကျော် တိုက်ခိုက်ပြီး လူပေါင်း ၁၄၀၀ လောက်ကို သတ်ဖြတ်ခဲ့တဲ့ အောက်တိုဘာ ၇ ရက် ဖြစ်စဉ်အပြီး အစ္စရေးက ဂါဇာကို တုံ့ပြန် ထိုးစစ်ဆင်ခဲ့တာ တစ်လကျော် ကြာမြင့်လာတဲ့နောက် ပါလက်စတိုင်းဖက်က အသေအပျောက် သောင်းနဲ့ချီ များပြားလာခဲ့ပါတယ်။
တစ်ချိန်တည်းမှာပဲ ဟက်ဇ်ဘိုလာတွေနဲ့ အစ္စရေး စစ်တပ်ကလည်း နယ်စပ်မှာ အပြန်အလှန် ဒုံးကျည်တွေ၊ လက်နက်ကြီးတွေနဲ့ ပစ်ခတ်ရင်း အခြေအနေတွေ တင်းမာနေခဲ့ပါတယ်။
