Nazirlər Kabinetinin 13 may 2005-ci il tarixli, 87 saylı qərarının yenilənməsi təklif olunur.
Gununsesi.info xəbər verir ki, təklifə əsasən, “Şəkərli diabet xəstəliyinə tutulmuş şəxslərə göstərilən illik tibbi yardımın (o cümlədən zəruri müayinələrin) həcmi, inyeksiya vasitələrinin, insulin və digər şəkərsalıcı dərman preparatlarının, özünənəzarət vasitələrinin siyahısı və miqdarı”nın, eləcə də diabet xəstələrinin insulin və digər dərman preparatları, inyeksiya və özünənəzarət vasitələri ilə təminatı qaydasının müasir dövrün tələblərinə uyğunlaşdırılması məqsədəuyğun hesab edilir.
Bildirilib ki, son illər yeni elmi-tibbi biliklərin tətbiqi, aparılan təhlil və qiymətləndirmələr, həmçinin beynəlxalq müsbət təcrübə nəzərə alınmalıdır. Məsələn, Türkiyə təcrübəsində 1-ci tip şəkərli diabet xəstələri üçün vizual test-çubuqlarının aylıq norması 150 ədəd müəyyən edilib.
Təklif qərarın müasir tibbi yanaşmalara uyğun təkmilləşdirilməsini və şəkərli diabet xəstələrinin daha effektiv tibbi təminatının gücləndirilməsini nəzərdə tutur.
