Qəzza zolağındakı quyulardan su hasilatı bölgənin su ehtiyacını təmin edən yeganə mənbə olan su quyularının istismarı üçün lazım olan yanacağın olmaması səbəbindən istənilən vaxt dayandırıla bilər.
Gununsesi.info-nun məlumatına görə, Qəzza Şəhər Bələdiyyəsinin sözçüsü Hüsni Muxenna “Anadolu” agentliyinə bildirib ki, ayın əvvəlindən bələdiyyəyə bir litr də yanacaq daxil olmayıb və bu da öz növbəsində regionda humanitar böhranı daha da gücləndirir.
O qeyd edib ki, qəzzalılar su ilə üç mənbə vasitəsilə təmin edilib. İlk və ən vacib mənbə şəhərin ehtiyaclarının 40 faizini təmin edən İsrail şirkətindən idi, o, oktyabrın 7-dən sonra su təchizatını dayandıb.
Muxenna bildirib ki, bölgənin su ehtiyacını təmin edən sutəmizləyici qurğu elektrik enerjisinin kəsilməsi və yanacaq çatışmazlığı səbəbindən fəaliyyətini dayandırıb və eksklavda yalnız su quyuları fəaliyyət göstərir.
Onun sözlərinə görə, bələdiyyə mövcud yanacaqdan su quyularının istismarı üçün istifadə oluna bilməsi üçün məişət tullantıları və zibil toplama xidmətləri göstərməyi dayandırıb.
Bələdiyyə nümayəndəsinin sözlərinə görə, İsrail ordusu Qəzzada bir neçə quyu bombalayıb, digər hissəyə isə yanacaq çatışmazlığı səbəbindən xidmət göstərmək mümkün olmayıb.
“Cəmi üç quyu qalıb, onları gündə cəmi üç saat işlətmək olar”, – deyə o bildirib.
O əlavə edib ki, hazırda regionun suya olan tələbatını ödəyən yeganə mənbə olan su quyularının istismarı üçün lazım olan kifayət qədər yanacağın olmaması səbəbindən quyulardan su hasilatı istənilən vaxt dayana bilər.
Bələdiyyə nümayəndəsinin sözlərinə görə, İsrail Qəzza zolağının şimalına su, ərzaq və yanacaq çatdırılmasının qarşısını almağa davam edərsə, bölgədə vəziyyət fəlakətə çevriləcək: “Qəzzalılar su və ərzaq böhranı şəraitində sağ qalmaq üçün mübarizə aparır. Yarım milyon fələstinli aclıq və susuzluqdan ölmək təhlükəsi ilə üz-üzədir”.
Gununsesi.info
