Bakıda qanunsuz neft məhsulları satışının qarşısı alınıb.
Mia.az xəbər verir ki, bu barədə Fövqəladə Hallar Nazirliyi məlumat yayıb.
Bildirilib ki, FHN-in “112” qaynar telefon xəttinə Bakı şəhəri, Xətai rayonu, Mingəçevir küçəsi, 40 ünvanında yerləşən “Avto Qarant” ASC-nin ərazisində yanğın və texniki təhlükəsizlik qaydalarına zidd olaraq yanacaq məhsulları (yağ) ilə dolu çənlərin saxlanılması və qanunsuz satışının həyata keçirilməsi barədə müraciət daxil olub.
Müraciətlə əlaqədar nazirliyin Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyi və Dövlət Yanğın Nəzarəti Xidmətinin əməkdaşları dərhal göstərilən ünvana cəlb edilib.
Keçirilən baxış zamanı həqiqətən də yanğın və texniki təhlükəsizlik qaydalarının bir sıra tələblərinin kobud şəkildə pozulması ilə insan həyatı və sağlamlığı üçün təhlükə yaradaraq, neft məhsullarının saxlanılması və satışının həyata keçirilməsi faktı aşkar edilib.
Aşkar olunan nöqsanların insan həyatı və sağlamlığı üçün yaratdığı təhlükə nəzərə alınaraq, çənlərin istismarı FHN əməkdaşları tərəfindən dərhal dayandırılıb və pozuntuların aradan qaldırılması üçün tərtib olunmuş akt sahibkara təqdim edilib. Bununla yanaşı, yanğın və texniki təhlükəsizliklə bağlı sahibkar və işçilərlə profilaktik söhbət aparılıb.
Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyi və Dövlət Yanğın Nəzarəti Xidməti yanğın və texniki təhlükəsizlik qaydalarının tələblərinin təmin edilməsi istiqamətində birgə fəaliyyətini davam etdirir.
Qeyd edək ki, bu xəbərlə bağlı adıçəkilən ASC-nin qanuni sahiblərindən biri olmuş Nazim Bəydəmirli də sosial şəbəkədə paylaşım edib.
O, yazır:
“Bu ASC-nin 30% səhmdarı olaraq Vergilər Xidmətinə, Baş Prokurorluğa, DİN-ə və digər strukturlara bəlkə onlarla rəsmi müraciət etmişəm ki, bir qrup cinayətkar mütəşəkkil dəstə yaradıb həm vergiləri gizlədir, həm də hüquqa zidd fəaliyyət göstərir.. Onlar da kimisi akt yazır, kimisi də aktsız filansız gəlib rüşvət alıb gedirlər. “Sahibkar” dedikləri yaramaz da gəlib mənə meydan oxuyur. Yəqin FHN də nəticəni açıqlayar ki, rüşvət aldılar ya yox?
Sonuncu ərizəmə 2 aydan çoxdur DİN-nin BMCQMİ idarəsi “baxır”.
Ümid edək ki, nəticəsi müsbət olacaq!”
