ABŞ-ın lazımi liderlik göstərməməsi (və ya göstərə bilməməsi) fonunda Avropa ölkələrinin Ukrayna məsələsində aktivliyinin tədricən artması müşahidə olunur.
Bu gün İsveçin açıqladığı 1,3 milyard dollarlıq hərbi yardım paketində ASC 890 təyyarəsi diqqəti cəlb edir. İsveçin öz istehsalı olan (“Saab AB” şirkəti) bu təyyarələr radiolokasion kəşfiyyat və döyüş idarəetməsi üçün nəzərdə tutulub.
450 km-ə qədər radiusda hava və dənizdəki obyektləri aşkarlamağa imkan verən ASC 890 təyyarəsi F-16-lar ilə qarşılıqlı əlaqədə fəaliyyət göstərəcək.
Belçika isə Ukraynaya 30 ədəd F-16 verəcəyini açıqlayıb. Bununla Ukrayna Hava Qüvvələrinin ixtiyarında olan F-16-ların sayı 85-ə çatacaq. (ABŞ-da 900-dən çox F-16 olmasına baxmayaraq, hələ ki Ukraynaya 1 ədəd belə verməyib).
Gələn həftə prezident Zelenskinin Fransaya səfəri zamanı prezident Makron tərəfindən Ukraynaya hərbi kontingent (təlimatçı qismində) göndərilməsi barədə qərarın elan olunacağ gözlənilir.
Makron Ukraynanın Qərb silahları ilə Rusiya ərazisindəki atəş nöqtələrinə zərbə endirməsinə icazə verilməsinə tərəfdar olduğunu da bildirib.
Bayden administrasiyası isə milli təhlükəsizlik müşaviri Sallivanın müəyyənləşdirdiyi “eskalasiyanı yüksəltməmək” strategiyasına davam edərək hadisələrin arxasınca sürünür.
Rusiyanın işğalçı hücumlarının və hərbi cinayətlərinin artaraq davam etdiyi bir məqamda mövcud ABŞ hökumətinin hələ də bu strategiyasına sadiq qalması amoral və gülüncdür.
Haqlı və məzlum Ukraynaya lazımi səviyyədə yardım etməzkən hərbi cinayətlər törədən İsrailə dəstəyin davam etməsi də başqa bir mənəviyyatsızlıq örnəyidir.
Şahin Cəfərli
Gununsesi.info
