အမေရိကန် လေကြောင်းပြပွဲမှာ ဒုတိယ ကမ္ဘာစစ်လက်ကျန် လေယာဉ်နှစ်စီး တိုက်မိ

အမေရိကန် နိုင်ငံက လေကြောင်းပြပွဲ တစ်ခုမှာ ဒုတိယ ကမ္ဘာစစ်လက်ကျန် လေယာဉ်နှစ်စီး တိုက်မိလို့ လူ ၂ ဦးထက်မနည်း သေဆုံးခဲ့ကြောင်း သိရပါတယ်။

တက္ကဆက်စ် ပြည်နယ်မှာ နိုဝင်ဘာ ၁၂ ရက်က အနိမ့်ပျံသန်းလာတဲ့ B-17 Flying Fortress ဗုံးကြဲလေယာဉ်နဲ့ P-63 Kingcobra တိုက်လေယာဉ်တို့ တိုက်မိခဲ့တာ ဖြစ်ပါတယ်။ B-17ဟာ ဒဲလက်စ်မြို့မှာ ကျင်းပနေတဲ့ လေကြောင်းပြပွဲ တစ်ခုမှာ ပါဝင် ပျံသန်းနေခဲ့တာပါ။

လေယာဉ်နှစ်စီးပေါ်မှာ စုစုပေါင်း ဘယ်နှဦး စီးနင်းလိုက်ပါခဲ့သလဲ ဆိုတာကိုတော့ မသိရသေးပါဘူး။ လေယာဉ်တွေဟာ လေထဲမှာ တိုက်မိပြီးတဲ့နောက် အသီးသီး ပျက်ကျခဲ့ကြပါတယ်။ သတင်းတွေက အနည်းဆုံး ၂ ဦးသေတယ်လို့ ဖော်ပြနေပေမယ့် တချို့မီဒီယာတွေမှာတော့ အသေအပျောက်က ၆ ဦးထိရှိတယ်လို့ ဆိုပါတယ်။

တက္ကဆက်စ် လေယာဉ်မှူးများ အသင်းကတော့ သေဆုံးသူတွေထဲက အနည်းဆုံး ၂ ဦးရဲ့ နာမည်ကို အတည်ပြု ထုတ်ပြန်ထားပါတယ်။

P-63တွေဟာ တစ်ယောက်စီး လေယာဉ်ငယ်တွေဖြစ်ပြီး B-17တွေကတော့ အဖွဲ့သား ၁၀ ယောက်လောက်ထိ စီးနင်း လိုက်ပါနိုင်ပါတယ်။ လေယာဉ်တွေဟာ တိုက်မိတဲ့နောက် လေယာဉ်ကွင်းထဲ ပျက်ကျပြီး မီးစွဲလောင်ခဲ့ကြောင်း မျက်မြင်တွေက ပြောပါတယ်။

အမေရိကန်ရဲ့ ပြည်ထောင်စု လေကြောင်း လုံခြုံရေး ဌာနက ၃ ရက်ကြာ ကျင်းပတဲ့ အစီအစဉ်မှာ ဘယ်လို ဆိုးဆိုးရွားရွား လွဲချော်မှုမျိုး ဖြစ်သွားခဲ့သလဲ ဆိုတာကို စုံစမ်းသွားမယ်လို့ ပြောပါတယ်။ ဒဲလက်စ် မြို့တော်ဝန် အဲရစ်ဂျွန်ဆန်က စစ်မှုထမ်းဟောင်းများနေ့ကို ကြိုဆို ဂုဏ်ပြုတဲ့ အနေနဲ့ ဒုတိယ ကမ္ဘာစစ်က လေယာဉ်တွေကို ပါဝင် သရုပ်ပြ ပျံသန်းစေဖို့ စီစဉ်ထားရာကနေ ကြေကွဲစရာ ဖြစ်ရပ်မျိုး ပြောင်းလဲသွားခဲ့ကြောင်း ပြောပါတယ်။

ဒီမတော်တဆမှုမှာ ထိခိုက် သေဆုံးမှု ဘယ်လောက် ရှိခဲ့သလဲ ဆိုတာကတော့ အခုထိ သတင်းတွေ ရှုပ်ထွေးနေဆဲပါ။

B-17 တွေဟာ ဒုတိယ ကမ္ဘာစစ်မှာ မဟာမိတ်တွေက နာဇီ ဂျာမနီအပေါ် လေကြောင်းအင်အား အသာစီး ရယူခဲ့ရာမှာ အဓိက အကျဆုံး အခန်းကဏ္ဍက ပါဝင်ခဲ့တဲ့ မဟာဗျူဟာ ဗုံးကြဲလေယာဉ်တွေ ဖြစ်ပါတယ်။ P-63တွေကိုတော့ အမေရိကန်က ထုတ်လုပ်ပေမယ့် အမေရိကန် လေတပ်မှာ မသုံးစွဲခဲ့ဘဲ ဆိုဗီယက် လေတပ် တစ်ခုတည်းကသာ တိုက်ခိုက်ရေး ကဏ္ဍမှာ လက်တွေ့ အသုံးပြုခဲ့ကြောင်း သိရပါတယ်။