တအောင်းတပ်မတော်(TNLA) တပ်မဟာ(၂)စစ်ဒေသ နမ့်ဆန်မြို့နယ် ကုန်းသာရွာနှင့် ဟူမန်းကျေးရွာအနီးတွင် စစ်ကောင်စီတပ်က လေကြောင်းတိုက်ခိုက်မှု ဆက်လက်လုပ်ဆောင်လျက်ရှိကြောင်း TNLAက ယခုညပိုင်း၌ သတင်းထုတ်ပြန်သည်။
အဆိုပါဒေသတွင် စစ်ကောင်စီတပ်က ဒီဇင်ဘာ ၇ရက်မှစ၍ တိုက်လေယာဉ်၊ ရဟတ်ယာဉ်များ အသုံးပြု လေကြောင်းတိုက်ခိုက်မှုများ နေ့စဉ်ပြုလုပ်လျက်ရှိသည်ဟု ဆိုသည်။ TNLA နှင့် စစ်ကောင်စီတပ်တို့သည် ဒီဇင်ဘာ ၇ရက်နေ့လယ်၂နာရီခွဲမှ ယနေ့ညနေ ၆နာရီအထိ တိုက်ခိုက်မှုရပ်နားခြင်းမရှိဘဲ လေးရက်ဆက် နေ့ရော ညပါ တိုက်ပွဲပြင်းထန်နေသည်ဟု TNLAက ထုတ်ပြန်သည်။
ယနေ့(ဒီဇင်ဘာ ၁၀ရက်)တွင် နံနက်အစောပိုင်းမှစ၍ နှစ်ဖက် မြေပြင်ရင်ဆိုင်တိုက်ခိုက်မှု ဖြစ်ပွားခဲ့ရာ တိုက်လေယာဉ် နှစ်စီးဖြင့် လေကြောင်းမှ ဗုံးကြဲတိုက်ခိုက်မှု ငါးကြိမ်ပြုလုပ်ခဲ့ကြောင်း၊ ထို့ပြင် ရဟတ်ယာဉ်ဖြင့် လေကြောင်း ပစ်ကူ ခြောက်ကြိမ်ပြုလုပ်ခဲ့ကြောင်း TNLAက ထုတ်ပြန်သည်။
ထိုသို့ လေကြောင်းမှ ပစ်ခတ်သည့်အပြင် ကုန်းသာရွာရှိ အရပ်သားပြည်သူ လူထုနေအိမ် ငါးလုံးနှင့် သံဃာတော် ဆွမ်းစားဆောင်တို့ကို စစ်ကောင်စီတပ်က မီးရှို့ခဲ့သည်ဟု ဆိုသည်။
လေးရက်ကြာမြင့်ပြီဖြစ်သော တိုက်ပွဲများအတွင်း နှစ်ဖက်ထိခိုက်ကျဆုံးမှုရှိခဲ့ကြောင်း TNLA သတင်းနှင့် ပြန်ကြားရေးဌာနက အသိပေးသော်လည်းအရေအတွက် အသေးစိတ်ကို မြေပြင်မှ သတင်းမရသေးဟု သတင်းပြန်ကြားရေးဌာနမှူး ဒုဗိုလ်မှူးကြီးတာအိုက်ကျော်က ပြောကြားထားသည်။
