အာဏာရှင်​ဟောင်းဦးသန်း​ရွှေသမက် ဦး​ဆောင်​သော​တောင်တက်အဖွဲ့ချုပ်ပုပ္ပါး​တောင်တက်စဥ်အမှိုက်ပစ်၍ ​ဝေဖန်​မှုကြုံ

▪︎အဖွဲ့ဝင်မဟုတ်ဘဲ ​ဂေါက်​နေသူတစ်ဦးအမှိုက်ပစ်ခဲ့ခြင်းသာဖြစ်ပြီးလက်မခံဘဲပြန်ခိုင်းလိုက်ဟုဦးသန်း​​ရွှေသမက်​ဖြေရှင်း

အာဏာရှင်ဟောင်းဦးသန်းရွှေ၏သမက် ​ဒေါက်တာ​နေစိုး​မောင်ဥက္ကဌ အဖြစ် ဆောင်ရွက်နေသော မြန်မာနိုင်ငံခြေလျင်နှင့်တောင်တက်အဖွဲ့ချုပ်က ပုပ္ပါးတောင်မကြီးပေါ်သို့ ယမန်နေ့က တက်ရောက်လာစဥ်အမှိုက်ချသွား၍ ဒေသခံအချို့ နှင့်ပတ်ဝန်းကျင်ထိန်းသိမ်းရေးဆောင်ရွက်သူများကဝေဖန်နေကြသည်။

မြန်မာနိုင်ငံခြေလျင်နဲ့တောင်တက်အဖွဲ့ချုပ်မှအဖွဲ့ဝင်များနှင့် ယင်းအဖွဲ့နှင့်အတူလိုက်ပါလာသူများသည်ယမန်နေ့(နိုဝင်ဘာလ ၅ရက်)တွင် ပုပ္ပါးတောင်မကြီးသို့ တက်လာခဲ့ခြင်းဖြစ်သည်။ ယင်းအဖွဲ့သည် တောင်ပေါ်ရင်ပြင်တွင် အမှိုက်ချသွားသည်ကို ပက်ပင်းတိုး၍ ပြန်ကောက်ခိုင်းသော်လည်း မကောက်ခဲ့ဟု မဟာဂီရိတောတွင်းတောင်တက်ဝန်ဆောင်မှု(ပုပ္ပါးတောင်ဥယျာဉ်) တာဝန်ရှိသူတစ်ဦးက လူမှုကွန်ရက်တွင်ရေးသားထားသည်။

“မြန်မာနိုင်ငံခြေလျင်နဲ့တောင်တက်အဖွဲ့ချုပ်က ဒီကနေ့ ပုပ္ပါးတောင်မကြီးကို တောင်တက်လာတယ်။မဟာဂီရိ က တောင်တက်ဝန်ဆောင်မှု နဲ့တိုးတယ်။ အမှိုက်ချခဲ့တယ်။အမ အမှိုက်ပြန်ကောက်သွားပြောတော့အေးဆေးပဲ။ကောက်မသွားဘူး။သူတို့အဖွဲ့ထဲက သူ သက်သေရှိသလိုကျွန်တော့ မဟာဂီရိ က သက်သေရှိတယ်” ဟုမဟာဂီရိတောတွင်းတောင်တက်ဝန်ဆောင်မှု(ပုပ္ပါးတောင်ဥယျာဉ်)မှကိုတင်ကိုမင်းကရေးသားထားသည်။

အထက်ပါဖြစ်ရပ်အားဒေါက်တာနေစိုးမောင်ကိုလည်းအသိပေး ပေးကြရန်၎င်းကတိုက်တွန်းထားသည်။

” တောင်တွေပတ်တက် အမှိုက်တွေ လိုက်ချနေတဲ့ အဖွဲ့များလားဟ။ဆောင်ပုဒ်အကြီးစားကြီးတွေ နဲ့ရှက်လဲ မရှက်တတ်ကြတဲ့သူတွေ။ဒေါက်တာနေစိုးမောင်နဲ့သိတဲ့သူများရှိရင် ပြောပေးပါဦး။တောင်တွေတောတွေပေါ် အမှိုက်တွေတော့ မချခဲ့ကြပါနဲ့လို့” ဟုကိုတင်ကိုမင်းက ရေးသားထားသည်။

အမှိုက်ချထားသူမှာ မြန်မာနိုင်ငံခြေလျင်နဲ့တောင်တက်အဖွဲ့ချုပ်နှင့်အတူလိုက်ပါလာသော်လည်းအဖွဲ့ဝင်မဟုတ်ကြောင်း၊ ဂေါက်နေသူဖြစ်ကြောင်းဒေါက်တာနေစိုးမောင်ကပြန်လည်ဖြေရှင်းထားရာ ယင်းအဖြေအပေါ် လူမှုကွန်ရက်သုံးစွဲသူအချို့က လှောင်ပြောင်ခဲ့ကြသည်။

“ဟုတ်ပါတယ်ဆရာတို့အဖွဲ့ဝင်မဟုတ်တဲ့သူတစ်ယောက် ဂေါက်နေတဲ့သူတယောက်ကပ်လိုက်လာတယ်။ဆရာတို့ရဲ့ uniform နဲ့လည်းမဟုတ်ပါ။သူ့ကိုလည်း လက်မခံဘဲ ပြန်ခိုင်းလိုက်ပါပြီ” ဟု ဒေါက်တာနေစိုးမောင်က ကိုတင်ကိုမင်း ရေးသားထားသည့် အကြောင်းအရာအောက်တွင် မှတ်ချက်ပြုထားသည်။ ​ဒေါက်တာ​နေစိုး​မောင်သည် အာဏာရှင်​ဟောင်းဦးသန်း​ရွှေ၏ သမက် ဖြစ်ပြီး ​နေ​ရွှေ​​သွေး​အောင်(ဖိုးလပြည့်)၏ ဖခင်ဖြစ်သည်။၎င်းသည် ပရဟိတအ​ရေးတွင်တက်ကြွသူတစ်ဦးဖြစ်​သော်လည်း စစ်​ကောင်စီအာဏာသိမ်းထား၍ ပြည်သူအများစု ခက်ခဲကြပ်တည်းတည်းကာ ရုန်းကန်​နေကြရ​သော​တော်လှန်​ရေးကာလတွင် လူငယ်များကိုစုစည်း၍​တောင်များလိုက်တက်​နေမှုအ​ပေါ် ၎င်းတို့အဖွဲ့၏ရည်ရွယ်ချက်နှင့် လုပ်ရပ်အ​ပေါ်သတိဖြင့်​စောင့်ကြည့်​နေသူများစွာရှိသည်။

​တောင်တက်ရင်းအမှိုက်ပစ်ခြင်းသည်သဘာဝပတ်ဝန်းကျင်ကို ဖျက်ဆီးသည့်လုပ်ရပ်သည် စည်းကမ်းမဲ့ပြီးအသိတရားမရှိသူများ၏လုပ်ရပ်ဟု ပုပ္ပါးတောင်မှ​ဒေသခံတစ်ဦးကလည်း​ပြောသည်။

ယခုလိုကာလတွင် ပုပ္ပါးတောင်သို့ မတက်ဘဲ ပုံတောင် ပုံညာတောင်သို့ လာတက်ကြရန်လည်း လူမှုကွန်ရက်သုံးစွဲသူတစ်ဦးက ခပ်ရွတ်ရွတ်မှတ်ချက်ပြုထားသည်။ ပုံတောင်ပုံညာတောင်သည် စစ်အာဏာရှင်တော်လှန်ရေးအားကောင်းပြီး စစ်ကောင်စီအုပ်ချုပ်၍မရတော့သည့် ယောဒေသမှ အထင်ကရတောင်တန်းတစ်ခုဖြစ်သည်။