စစ်ကားများသွားလာမှုအပေါ် စစ်ရေးလှုပ်ရှားရာ၌ ပြည်သူနှင့် ရောသွားမည်စိုး၍ဟု PDF ရဲဘော်ပြော
မန္တလေး-မြစ်ကြီးနား ဗျူဟာလမ်းမကြီးပေါ်ရှိ အင်းတော်မြို့နယ်ပိုင် ကျောင်းကုန်း-အင်းတော်-မော်လူး-ကသာ လမ်းပိုင်းအား ယနေ့မှစ၍ ညဘက်သွားလာခြင်းမပြုရန် တားမြစ်ချက် ထုတ်ပြန်လိုက်ကြောင်း Indaw Revolution(IR)က ဖော်ပြသည်။
“အဲဒါက ညဆိုလို့ရှိရင် စစ်ကောင်စီကားတွေတအား ဖြတ်လို့။ ဖြတ်လို့ရှိရင် ကျနော်တို့ စစ်ရေးလှုပ်ရှားလို့ရှိရင် ပြည်သူကားတွေနဲ့ ရောမှာ စိုးလို့ပေါ့။ အဲဒါကြောင့်မို့ပါ”ဟု အင်းတော်ပြည်သူ့ကာကွယ်ရေးတပ်(PDF) ရဲဘော်တစ်ဦးက ပြောသည်။
အဆိုပါ လမ်းပိုင်းကို ည ၆နာရီမှ နံနက် ၆နာရီ အတွင်း မည်သည့်ယာဉ်အမျိုးအစားမဆို လုံး၀ (လုံး၀) ဖြတ်သန်းသွားလာခြင်းမပြုလုပ်ရန် အလေးအနက် တားမြစ်လိုက်ကြောင်း Indaw Revolution က အသိပေးထားပြီး အကယ်၍ မလိုက်နာပါက ဖြစ်လာမည့် ကိစ္စအ၀၀ကို တာဝန်မယူကြောင်း ဖော်ပြထားသည်။
ယခု ထုတ်ပြန်ချက်နှင့် ပတ်သက်ပြီး အင်တာနက် လိုင်းရသည့် ပြည်သူများ အနေဖြင့် လိုင်းမရသည့် သူများအား ဖုန်းဆက်၍ သော်လည်းကောင်း၊ သင့်ရာနည်းဖြင့် ဆက်သွယ်အသိပေးရန် ပြည်သူများအား ပန်ကြားထားသည်။
ယခု ထုတ်ပြန်ချက်သည် ပြန်လည်ကြေညာခြင်း မရှိသရွေ့ အသက်ဝင်နေမည်ဖြစ်ကြောင်းလည်း ထုတ်ပြန်သည်။
