ပျူရွာကို တာဝေးပစ်ရော့ကတ်များဖြင့် MVRF တိုက်ခိုက်
မကွေးတိုင်း၊ မြိုင်မြို့နယ်တွင် မြေပဲဖော်နေသည့်ဒေသခံ တောင်သူများကိုပစ်ခတ်ခဲ့သည့် ကန်နီကျေးရွာရှိ ပျူစောထီးများကို တာဝေးပစ်ရှော့ကတ် များဖြင့် ပစ်ခတ်တိုက်ခိုက်ခဲ့ကြောင်း မြိုင်မြို့နယ် ကျေးရွာများတော်လှန်ရေးတပ်ဦး(MVRF) ဥက္ကဌဦးအောင်ဇေယျက ပြောသည်။
ယမန်နေ့ (နိုဝင်ဘာ ၃ ရက်) ည ၉နာရီခန့်ကမကွေးတိုင်း မြိုင်မြို့နယ်ရှိ ပျူစောထီးအင်အားကောင်းရာ ကန်နီရွာကို Myaing Villages Revolution Front – MVRF တပ်ရင်းနှင့် MRTF တပ်ဖွဲ့တို့ ပူးပေါင်းပြီး ရော့ကတ်များဖြင့် ကန်နီရွာအတွင်းသို့ ပစ်သွင်းတိုက်ခိုက်ခဲ့ကြခြင်းဖြစ်သည်။
ကန်နီရွာရှိ ပျူများသည် အနီးနားရှိ ကျေးရွာများက မြေပဲသီးနှံဖော်နေသော ဒေသခံတောင်သူများကို လက်နက်ငယ်များဖြင့် လိုက်လံပစ်ခတ်ခဲ့သည့် အတွက် တုံ့ပြန်တိုက်ခိုက်ခဲ့ခြင်းဖြစ်ကြောင်း MVRF ဥက္ကဌဦးအောင်ဇေယျက ပြောသည်။
“ကန်နီရွာရဲ့ပတ်ချာလည်က ပြည်သူတွေတောင်သူတွေ သီးနှံစိုက်ပျိုးခွင့်မရအောင် သိမ်းဆည်းခွင့်မရအောင် ဒုက္ခပေးနေတာက အခုမှမဟုတ်ဘူး။ ပြီးခဲ့တဲ့ မိုးဦးရာသီ နှမ်းသီးနှံသိမ်းစဥ်ကာလကလည်း အနီးနားက ကျေးရွာတွေက တောင်သူတွေကို လိုက်လံပစ်ခတ်တဲ့အတွက်ကြောင့် သီးနှံမသိမ်းဆည်းလိုက်ရဘဲ ဆုံးရှုံးသွားတဲ့ မြေဧကပေါင်း လေးဆယ်ခန့်ဆုံးရှုံးတာတွေရှိတယ်။ အခုလည်းပဲထပ်ပြီးတော့ မြေပဲသီးနှံပေါ့။ ရာသီသီးနှံသိမ်းစဥ်မှာ သူတို့လုပ်နေကျအတိုင်း ပြည်သူကိုဒုက္ခပေးတယ် ပစ်ခတ်တဲ့အတွက်ကြောင့် မဟာမိတ်တွေနဲ့ပေါင်းပြီး ပွဲကတာပါ။”ဟု ဦးအောင်ဇေယျက ပြောကြားသည်။
ထို့အပြင် စစ်ကောင်စီဘက်က အထိအခိုက်များကို လက်တလော မသိရသေးကြောင်း ၎င်းက ပြော သည်။
ကန်နီရွာသည် မြိုင်နယ်အတွင်း ပျူအင်အားကောင်းရာရွာတစ်ရွာဖြစ်ပြီး စစ်ကောင်စီတပ်နှင့်ပူးပေါင်းကာ ဒေသတွင်းကျေးရွာများအား ဝင်ရောက်ဖျက်ဆီးမီးရှို့မှုများ ပြုလုပ်နေသည်။
