ကချင်ပြည်နယ် မြစ်ကြီးနားမြို့ရှိ စစ်ကောင်စီ၏ ပြည်နယ်စုပေါင်းရုံး၌ ယမန်နေ့ညနေက ပေါက်ကွဲမှု ဖြစ်ပွားခဲ့ရာ အမျိုးသားတစ်ဦး ထိခိုက်ခဲ့ကြောင်း မြို့ခံတစ်ဦးက ပြောသည်။
“အဲဒီမှာ လူတစ်ယောက်ပါသွားတယ်။ ဒါပေမဲ့ ဘယ်သူလဲဆိုတာ သေချာတော့ မသိရဘူး။ ဖြစ်တာက စုပေါင်းရုံးမှာ။ မြို့လယ်မှာပဲရှိတာ။ ဘာကြောင့်ဆိုတာတော့ မသိရဘူး။ ပြီးခဲ့တဲ့ရက် ကလည်း ပေါက်ကွဲမှုရှိတယ်”ဟု မြစ်ကြီးနား ဒေသခံက ပြောသည်။
မြစ်ကြီးနားမြို့ ဧရာရပ်ကွက်ရှိ ပြည်နယ်စုပေါင်းရုံးအတွင်း ဆမားဒူဝါဆင်ဝါးနောင် ခန်းမအနီး အောက်တိုဘာ ၃၀ရက် ညနေ၆နာရီခွဲကျော်တွင် ပေါက်ကွဲမှု ဖြစ်ပွားရာ အသက် (၃၀)အရွယ်အမျိုးသားတစ်ဦး ထိခိုက်ဒဏ်ရာရခဲ့သည်ဟု Kachinwavesမီဒီယာ က ဖော်ပြထားသည်။
“ကျွန်မတို့ မြို့အခြေအနေက အားလုံးသတိထားပြီးနေရတဲ့အခြေအနေပေါ့နော်။ ဖားကန့်ကိစ္စ(အနန့်ပါလေကြောင်းတိုက်ခိုက်ခံရမှု)မှာ ပြန်လာတဲ့ လူနာမိသားစုတွေကို လိုက်စုံစမ်းတဲ့ဟာတွေပြီးရင် ကောလဟလလား တကယ်လား မသိပေမယ့်သူတို့ အဲဒါတွေကို ၁၇(၁)နဲ့အရေးယူမယ် အဲဒါလိုက်စုံစမ်းတဲ့ ပုံစံရှိတော့ နာရေးတွေလည်း ကောင်းကောင်းမလုပ်ရဘူး”ဟု မြစ်ကြီးနားဒေသခံက ပြောသည်။
ဖားကန့်မြို့နယ် အနန့်ပါဒေသ လေကြောင်းတိုက် ခိုက်ခံရမှုအပြီးနောက်ပိုင်းတွင် စစ်ကောင်စီတပ်ကမြို့ပေါ် သို့ လှည့်ပတ်ခြင်းများ ပိုမိုလုပ်ဆောင်လာသည်ဟု မြစ်ကြီးနားမြို့ခံက ပြောသည်။
အောက်တိုဘာ ၂၇ရက်ကလည်း မြစ်ကြီးနားမြို့ တပ်ကုန်းနှစ်ခြင်းဘုရားကျောင်းအနီး ဆွမ်ပရာဘွမ်လမ်းမပေါ်ရှိ UMG Myitkyina Branch ဘတ်ဟိုးရောင်းဝယ်ရေး ကုမ္ပဏီ ဝင်းအတွင်း မိုင်းပေါက်ကွဲမှုနှင့်ပစ်ခတ်မှုများဖြစ်ခဲ့သည်။
