မကွေးတိုင်း ပခုက္ကူခရိုင်ထဲက အဖွားအိုတစ်ဦးဟာ သူမရဲ့ရှေးဟောင်းနားကပ်တစ်ရံကို ပြည်သူ့ကာကွယ်ရေးတပ်ဖွဲ့၀င်တွေ လက်နက်၀ယ်ယူရေးအတွက် ပါ၀င်လှူဒါန်းခဲ့တယ်လို့ အနောက်ပိုင်းတိုင်းစစ်ဒေသ တပ်မဟာ (၇)၊ တပ်ရင်း (၇၁၀) တပ်ခွဲ – ၁ တပ်ခွဲမှူး Black က ပြောပါတယ်။
ပြီးခဲ့တဲ့ လပိုင်းက အဲဒီဒေသကို အကြမ်းဖက်စစ်ကောင်စီတပ်က စစ်ကြောင်းထိုးခဲ့ပြီး လက်နက်မပြည့်စုံတဲ့ ပြည်သူ့ကာကွယ်ရေးတပ်ဖွဲ့၀င်တွေဟာ ရှောင်တိမ်းရင်း အဖွားအိုနေထိုင်တဲ့ရွာကို ရောက်ရှိသွားခဲ့ပါတယ်။ ပြည်သူ့ကာကွယ်ရေးတပ်ဖွဲ့တွေရဲ့ အခက်အခဲကို သိရှိသွားတဲ့ အဖွားအိုဟာ လက်နက်တစ်လက်စာပေးဖို့ ငွေကြေးမရှိတာကြောင့် သူမပိုင်ဆိုင်တဲ့ ရှေး ဟောင်းနားကပ်တစ်ရံကို ရဲဘော်တွေကို ပေးအပ်ခဲ့တယ်လို့ တပ်ခွဲမှူး Black က ပြောပါတယ်။
“သေနတ်တစ်လက်စာကြီးတော့ အဖွားက မတတ်နိုင်ဘူး။ ဒီနားကပ် လေးတော့ အဖွားပေးနိုင်တယ်ဆိုပြီး ဒီအတိုင်းပဲပေးလိုက်တာ။ ကျွန်တော်လည်း အားကိုးစရာပြည်သူပဲ ရှိတာမို့ ပြည်သူတစ်ယောက်ချင်းစီတိုင်းကနေ ကျွန်တော်တို့ မဲလက်မှတ်လေးတွေကို ၀ယ်ယူပြီးတော့မှ ကျွန်တော်တို့ တပ်ခွဲအတွက် ကူညီစေချင်ပါတယ်။ ပြည်သူတွေခက်ခဲနေမှန်းသိပေမယ့် ဆက်လက်ကူညီပေးကြဖို့ မေတ္တာရပ်ခံပါတယ်”လို့ တပ်ခွဲမှူးက ဆိုပါတယ်။
စက်တင်ဘာ ၇ ရက်ကစတင်ခဲ့တဲ့ အဲဒီကံစမ်းမဲကမ်းပိန်းဟာ လက်မှတ်တစ်စောင် ကျပ်တစ်သောင်း၊ ထိုင်းဘတ် ၂၀၀၊ စင်ကာပူ ၅ဒေါ်လာ၊ အမေရိကန် ၅ ဒေါ်လာ၊ ကိုရီးယား၀မ် တစ် သောင်း သတ်မှတ်ထားပါတယ်။ ကမ်းပိန်းကို လာမယ့် စက်တင်ဘာ ၂၁ ရက်နောက်ဆုံးထားပါ၀င်နိုင်ပြီး အနောက်ပိုင်းတိုင်း တပ်မဟာ (၇) တပ်ရင်း (၇၁၀) အမည်နဲ့ ဖေ့ဘွတ် စာမျက်နှာ ကို ဆက်သွယ်မေးမြန်းနိုင်ပါတယ်။
ဆက်သွယ်လှူဒါန်းလိုပါက၎င်းတို့အဖွဲ့၏ (https://www.facebook.com/100568282713190/) သို့ ဆက်သွယ်လှူဒါန်းနိုင်ပါသည်။
