ကရင်အမျိုးသားအစည်းအရုံး(KNU) မူတြော် (ဖာပွန်)ခရိုင်တွင် စက်တင်ဘာလဆန်းအတွင်း တိုက်ပွဲများ၌ စစ်ကောင်စီနှင့် လက်အောက်ခံ နယ်ခြားစောင့်တပ်ဖွဲ့(BGF)တို့မှ သေဆုံးထိခိုက်များခဲ့ပြီး လက်နက်ခဲယမ်းများ သိမ်းဆည်းရရှိခဲ့ကြောင်း တပ်မဟာ (၅)က သတင်းထုတ်ပြန်သည်။
ဖာပွန်ခရိုင်အတွင်းစက်တင်ဘာ ၂ရက်နှင့် ၃ရက်တိုက်ပွဲသတင်းများကို ဖော်ပြခဲ့ခြင်းဖြစ်သည်။
စက်တင်ဘာ ၃ရက်က ဖာပွန်ခရိုင်၊ ဒွယ်လိုးမြို့နယ်ကတိုင်တိကျေးရွာအတွင်း အခြေချသည့် BGFတပ်ကို KNU တပ်မဟာ(၅)လက်အောက်ခံ တပ်ရင်း(၁၀၂) တပ်ဖွဲ့ဝင်များကခြုံခိုတိုက်ခိုက်ခဲ့ရာBGFဘက်မှ တပ်ခွဲမှူးအပါအဝင် လေးဦးသေဆုံးပြီး၅ဦးဒဏ်ရာရရှိခဲ့သည်ဟုထုတ်ပြန်သည်။ယင်းတိုက်ပွဲ၌ တပ်မဟာ (၅) တပ်ဖွဲ့ဝင်တစ်ဦး ကျဆုံးခဲ့သည်ဟု ဆိုသည်။
စက်တင်ဘာ ၂ရက်ကလည်း ဖာပွန်ခရိုင် လူသောမြို့နယ် ခေါ့ဒေးဝါမီလူ ဒေသအတွင်းရှိ စစ်ကောင်စီတပ်ကို တပ်မဟာ(၅)က ဝင်ရောက်တိုက်ခိုက်ခဲ့ရာစစ် ကောင်စီတပ်ဖွဲ့ဝင် ရှစ်ဦးသေဆုံးပြီး လက်နက် (၈)လက်နှင့် ဗုံးသီးများ၊ကျည်များ ၊ စစ်အသုံးအဆောင်ပစ္စည်းများသိမ်းဆည်းရရှိခဲ့ကြောင်း ထုတ်ပြန်သည်။
ယင်းတိုက်ပွဲ၌ တပ်မဟာ(၅) တပ်ဖွဲ့ဝင်များသေဆုံးထိခိုက်မှုမရှိကြောင်း ဖော်ပြထားသည်။
KNU တပ်မဟာ(၅)တပ်ဖွဲ့ဝင်များနှင့် စစ်ကောင်စီတပ်တို့ တိုက်ပွဲများ နေ့စဉ်နီးပါး ဖြစ်ပွားလျက်ရှိရာ ဩဂုတ်လအတဗွင်းက တိုက်ပွဲ၁၁၈ကြိမ်ဖြစ်ခဲ့ပြီး စစ်ကောင်စီတပ်နှင့် BGF တပ်ဖွဲ့ဝင် ၈၀ကျော်သေဆုံးခဲ့ကြောင်း တပ်မဟာ(၅)က သတင်းထုတ်ပြန်ထားသည်။
