တစ်ခေတ်တခါကတော့ အညာမှာ အခုလို လှည်းတန်းကြီးတွေမြင်ရရင် ဘုရားပွဲတော်သွားကြတဲ့ မြင်ကွင်းမျိုးပါ။ အခုတော့ စစ်ကောင်စီတပ်ရဲ့ စစ်ကြောင်းထိုး အကြမ်းဖက် ဖျက်ဆီးမီးရှို့မှုတွေကြောင့် လှည်းတွေနဲ့ ထွက်ပြေးတိမ်းရှောင်လာကြတဲ့ မကွေးတိုင်း၊ မြိုင်မြို့နယ်က ပြည်သူတွေရဲ့ ပုံရိပ်တွေပဲ ဖြစ်ပါတယ်။
ယခုရက်ပိုင်းမှာပဲ မြိုင်နယ်က ကျေးရွာအများစုဟာ စစ်ကောင်စီတပ်ရဲ့ အကြမ်းဖက်မှုတွေကြောင့် တိမ်းရှောင်နေကြရပါတယ်။
ပြည်သူ့နေအိမ်တွေကို မီးရှို့တာ၊ ကျေးရွာနေပြည်သူတွေ မွေးမြူထားတဲ့ နွား၊ဆိတ်၊ဝက်၊ကြက်များကို ပစ်ခတ်စားသောက်တာတွေ ပြုလုပ်လျက်ရှိတယ်လို့ မြိုင်မြို့နယ် ကျေးရွာများ တော်လှန်ရေးတပ်ဦး MVRFက ပြောပါတယ်။
မြိုင်နယ်အတွင်းရှိ ပြည်သူတွေဟာ မိမိတို့ပိုင်ဆိုင်တဲ့ ကား၊လှည်း၊ဆိုင်ကယ်များနဲ့ ထွက်ပြေးတိမ်းရှောင်နေရပြီး ထောင်ချီတဲ့ပြည်သူတွေဟာ မိုးရွာစို၊ နေပူခြောက်နဲ့ ကိုယ့်တောင်သူလုပ်ငန်းတွေ ပစ်ချထားခဲ့ရပါတယ်။
