ကရင်အမျိုးသားအစည်းအရုံး(KNU) တပ်မဟာ(၆)နယ်မြေ ကော့ကရိတ်မြို့နယ် ဘော့ဒိုင်းကျေးရွာကို စစ်ကောင်စီတပ်က ယမန်နေ့ညပိုင်း၌ လေယာဉ်ဖြင့် ဗုံးကြဲသွားကြောင်း ဒေသတွင်းရှိ ပြည်သူ့ကာကွယ်ရေးတပ်(PDF) တပ်ဖွဲ့တာဝန်ရှိသူတစ်ဦးက ပြောသည်။
“ သူတို့ ပထမတစ်ခါကြဲဖူးတဲ့ဘော်ဒိုင်းကို ထပ်ကြဲတာ။ လွန်ခဲ့တဲ့နှစ်လလောက်က ကြဲသွားတဲ့နေရာကို ည ၁၂နာရီလောက်က ကြဲသွားတာ။ အထိအခိုက်မရှိဘူး”ဟု ၎င်းက ပြောသည်။
စစ်ကောင်စီတပ်သည် မြ၀တီမြို့နယ် မြ၀တီ-ဝေါ်လေ ကားလမ်းအနီးတဝိုက်ဒေသများကိုလည်း လေကြောင်း တိုက်ခိုက်မှုများ အကြိမ်ကြိမ်ပြုလုပ်ခဲ့သည်။
ပြီးခဲ့သည့်ရက်ပိုင်းအတွင်းက လေကြောင်းတိုက်ခိုက်မှု၊ လက်နက်ကြီးနှင့် အတွဲလိုက်ဒုံးများပစ်ခတ်မှု၊ မြေပြင် စစ်အင်အား အလုံးအရင်းဖြင့် ထိုးစစ်ဆင်မှုတို့ဖြင့် KNU ဦးဆောင်သည့် ပူးပေါင်းတပ်ဖွဲ့များကို ထိုးစစ်ဆင်လျက်ရှိရာ တိုက်ပွဲများ ပြင်းထန်ခဲ့ပြီး စစ်ကောင်စီတပ်က အထိနာလျက်ရှိသည်။
ဩဂုတ် ၁၅ရက်ကလည်း ကော့ကရိတ်မြို့ပေါ်ရှိ စစ်ကောင်စီတပ်စွဲရာနေရာများကို ပူးပေါင်းတပ်ဖွဲ့က ဝင်ရောက်တိုက်ခိုက်ခဲ့ရာ ရဲမှူးအပါအဝင် စစ်ကောင်စီတပ်ကသေဆုံးထိခိုက်မှုများရှိခဲ့သည်။
