التحقيق في اتهام زوجة المحامي نبيه الجنادي لضابط سابق ومرشح برلماني بالتحرش.. ونبيه: إخلاء سبيلي بكفالة 500 جنيه وهو بـ20 جنيها
كتب- حسين حسنين
كشف المحامي الحقوقي نبيه الجنادي، عن تفاصيل التحقيقات حول واقعة الاعتداء عليه والتحرش بزوجته من ضابط سابق ومرشح لانتخابات مجلس النواب.
وقال الجنادي، في تصريحات لـ”درب”، إن النيابة استمعت لأقواله كمجني عليه في واقعة الاعتداء عليه من المتهم بالتحرش بزوجته وإحداث إصابات به، ثم حققت معه كمتهم بالاعتداء على المتهم بالتحرش.
وأضاف نبيه أن قرار النيابة صدرت وقتها بإخلاء سبيله بكفالة 500 جنيه وإخلاء سبيل المتهم بالتحرش بكفالة 20 جنيها، مع استكمال التحقيقات بعد ورود تحريات المباحث.
وقال نبيه، إنهم توجهوا اليوم إلى نيابة التجمع للسؤال حول التحريات ولكن كان رد النيابة بأنها لم تصل إليها حتى الآن، فيما طالبت النيابة بسرعة التحريات لاستكمال التحقيقات في المحضرين.
وتابع نبيه: “جرى التحرش بسارة زوجتي والتعدي علي، والضغط علينا بكل الطرق عشان نتنازل عن حقنا، من شخص مرشح لمجلس النواب، ووارد جدًا يبقي في يوم من الأيام نائب عن الشعب، وفعلًا مش عايزين أكثر من حقنا والحقيقة، واحنا مكملين مهما كانت العواقب”.
وكانت سارة خالد زوجة المحامي الحقوقي نبيه الجنادي قد روت تفاصيل ما جرى معها في تدوينة مطولة، جاء فيها:
بخصوص واقعة التحرش فا أنا عملت محضر ضد المشكو في حقه اللي بالصدفة طلع مرشح مجلس نواب وعمره 51 سنة وبيدعي اني زي بناته ومستحيل يكون صدر منه فعل يضايقني. الواقعة حصلت في مول بالتجمع الخامس حوالي الساعة 8 م (يوم 11 أكتوبر) وتبعها واقعة اعتداء بالضرب علي نبيه (جوزي) من المتهم بالتحرش وده مسجل في الكاميرات اللي طلبنا تفريغها وأفراد الأمن شاهدين علي واقعة الاعتداء وبعض العاملين بالمكان.
بعدها خرجنا من المول وقررنا نطلب النجدة والشخص المشكو في حقه كان جوا المكان مخرجش. طبعا ناس كتير حاولوا إقناعنا بالتنازل ومسامحته لأنه راجل كبير وعيب وخلاص بس ده قابلته بهجوم ومنعتهم من التدخل وفرض وصايا عليا ونصيحتي بشئ لأنه من الوقاحة التدخل في رد فعل مؤذي ليا.
بعدها اتفاجئنا انه خرج من المول وبعد عن المكان فبديهي اني أحاول احفظ حقي وبالتبعية حق نبيه اللي وقع اعتداء عليه! فطلبت منه يصوره لحفظ حقوقنا. لما اكتشف انه بيتصور اتحرك بسرعة جدا وجه يمشي ورايا بسرعة جدا وفتح كاميرا الموبايل بتاعه وابتدي يصورني وانا وقتها كنت بمد ومش حابة احس اني منتهكة بالشكل ده ولفيت ضهري وسط ده كله الناس بتتفرج ومحدش حاول يوقفه او يمنعه. نبيه حاول يمنعه .
بعدها اختفي من قدامنا وجالنا أمين شرطة من قسم التجمع الخامس وقالنا طب هساعدكم ازاي وهو هرب وقال نصًا “أنا عايز جثة” قولتله يعني ايه مطلوب مني اي حد يتحرش بيا اطلب بطاقته واقوله بعد اذنك هعملك محضر ومحتاجة بياناتك! قالي طب اتفضلي يا أستاذة علي القسم وأخدنا تاكسي واتحركنا أثناء كتابة المحضر ظهر الشخص المتحرش/ المعتدِ (المشكو في حقه) وكان جاي يعمل محضر تعدي ضد نبيه.
تم الضغط عليا بكل الطرق للتنازل والتصالح ولكن رفضت وأطراف من معارفه حاولوا إقناعي بالتصالح وإقناع نبيه ولكنه قالهم ده حقها وهي حرة وأنا مش هقدر أتدخل في ده.
كل ده استغرق حوالي 5 ساعات في القسم علي ما خرجنا بعد ما تم أخذ أقوالنا ومضينا واتاخدت بطاقاتنا الشخصية ومضينا تعهد بأننا هنمثل امام النيابة في صباح اليوم التالي للواقعة.
تاني يوم روحنا نيابة التجمع الخامس الساعة 9 ص في حضور المحامين/ات ووكيل النيابة ناقشنا في الواقعة والتحقيقات بدأت رسميًا حوالي الساعة 8 م تقريبا تم سؤالي كمجني عليا في واقعة التحرش وتم سؤال نبيه كمجني عليه في واقعة الاعتداء وبعدها تم التحقيق مع الجاني والنيابة وجهت له تهم (تحرش-ارتكاب فعل فاضح في مكان عام -الإعتداء-إتلاف) واتهم نبيه بالتعدي عليه وسبه وقذفه وبعدها تم التحقيق مع نبيه بصفته متهم والتحقيقات انتهت حوالي الساعة 1 ص والقرار طلع بالتحفظ علي نبيه والجاني وإخلاء سبيلهم من القسم بكفالة مالية والنيابة طلبت التحريات في الواقعة من المباحث والإجراءات استمرت من 1ص ل 4 ص وبعدها اتحركنا علي البيت.
-اللي قادرة أقوله دلوقتي هو شكرًا لكل حد كان داعم ووقف معانا واهتم شكرا للوقت والمجهود والاهتمام. تاني حاجة احنا مش هنتنازل ومكملين ونتمني ان الإجراءات تمشي في مسارها الصحيح دون مماطلة أو تهاون احنا عايزين حقنا مش أكتر.
